سڈنی ۔ 19 اگست (اے پی پی) آسٹریلوی حکومت ملک دے سبھے شہریاں کوں کورونا وائرس دی ویکسین مفت ڈیونڑ دا اعلان کرڈتے۔ برطانوی نشریاتی ادارے دی رپورٹ موجب آسٹریلوی وزیراعظم سکاٹ موریسن آکھیے جو یورپی دوا بنڑاونڑ آلی کمپنی آسٹرازینیکا اتے آکسفورڈ یونیورسٹی دی تیار کیتی گئی کورونا وائرس دی ویکسین کلینکل ٹرائل دے مرحلے اچ اے تے ایں حوالے نال آسٹرازینیکا دے نال معاہدہ تھی گے ۔انہاں آکھیے امکان اے جو اے ویکسین دا استعمال ہر شہری کیتے لازمی ہوسی۔آسٹریلوی وزیر اعظم موجب کلینکل ٹرائل اچ کامیابی دی صورت اچ ویکیسین اگلے سال ملنڑ شروع تھیسی تاں جو ملک دی ڈھائی کروڑ آبادی کوں ویکسین ڈیونڑ اچ کجھ مہینے لگ سگدن ۔انہاں آکھیے جو حکومت 95 فیصد آبادی کوں ویکسین ڈیونڑ دا ارادہ رکھیندی اے ۔آسٹریلیا اچ کورونا وائرس دے ایکٹو کیسز دی تعداد7 ہزار اتے ایں وبا نال مرنڑ آلیں دی تعداد 450 اے۔ ویکسین جیرھی ایں ویلھے انساناں تے تجربے دے چھیکڑی مرحلے وچ ہے ، گھننڑ کیتے کئی ملک آسٹرا زینیکا نال رابطے اچ ہن ۔
