ملتان ۔20 اگست (اے پی پی)ایڈیشنل انسپکٹر جنرل جنوبی پنجاب آفس دا باقاعدہ افتتاح کرڈتا گئے ۔ ایڈیشنل آئی جی انعام غنی دی آفس آمد تے پولیس دستے سلامی ڈتی ۔آرپی او ملتان وسیم احمد خان وی ایں موقع تے موجود ہن ۔ آرپی او ایں موقع تے خطاب کریندے ہوئیں آکھیے جو جنوبی پنجاب دے حوالے نال پولیس دا انتظامی یونٹ قائم کرڈتا گے ۔ ایڈیشنل انسپکٹر جنرل جنوبی پنجاب آفس مکمل طور تے خود مختار اے۔انہاں آکھیے جو آئی جی پنجاب عوام دی خدمت دا بھرپور مینڈیٹ ڈتے۔انہاں ڈسایا جو پولیس افسران دی تعیناتی مکمل تھی چکی اے تے وختی گزیٹیڈ سٹاف وی مل ویسی۔اے آئی جی آکھیے جو میڈا دفتر عوام کیتے زحمت کائناں رحمت بنڑسی اتے پولیس متعلقہ مسئلے ملتان اچ ہی حل کیتے ویسن ۔محرم الحرام دے سلسلے اچ انتظامات دے حوالے نال انہاں آکھیے جو محرم الحرام دے موقع تے صوبائی کابینہ کمیٹی اتے سارے ضلعی پولیس سربراہان نال میٹنگ تھئی اے ۔عاشورہ دے موقع تے کورونا ایس او پیز تے مکمل عملدرآمد کیتا ویسی ۔ انعام غنی آکھیے جو اج جنوبی پنجاب دے انتظامی یونٹ دے قیام دے پاسے ڈوجھا قدم اے ۔ انہاں مزید آکھیا جو کل بہاولپور اچ ایڈیشنل آئی جی دے دفتر دا افتتاح تھیسی۔
