کراچی۔13جون (اے پی پی)وفاقی وزیر اطلاعات و نشریات چوہدری فواد حسین آکھیے جو سندھ حکومت عوام کوں بنیادی سہولتاں ݙیوݨ اچ ناکام تھی چکی اے ، ہر پنج سال بعد پیپلز پارٹی توں کہیں ھک بندے کوں ربڑ سٹیمپ دے طور تے وزیراعلیٰ ہاؤس اچ بلھا ݙتا ویندے ، انہاں کوں فیصلہ کرݨ دااختیار نی ہوندا ، سارا اختیار انہاں ݙے ھے جو سندھ اسمبلی اچ نی بلاول ہاؤس اچ ٻہدن ، سندھ دے ضلعیں کوں فنڈز جاری نی کیتے ویندے ، زرداری خاندان سندھ اسمبلی کوں مفلوج کر ݙتے، سندھ حکومت اچ اتنی اہلیت نی جو او امن و امان کیتے سندھ پولیس کوں اپ گریڈ کر سڳے، مسلم لیگ (ن) اوورسیز پاکستانیاں کوں ووٹ دا حق ݙیوݨ دی مخالفت کیتی، انتخابی اصلاحات توں اے پرے بھجدے پن ، ن لیگ دا اڳلے الیکشن اچ کوئی مستقبل کائنی، اڳلے ست سال انہاں دا مستقبل ایہوہوسی جو اے لوک بینر گھن تے ھک چنڈ اچ کھڑے ہوسن جنہاں تے لکھیا ہوسی جو حکومت نامنظور، الیکشن نا منظور، انہاں کوں خطاطی سکھ گھنݨی چاہیدی اے تاں جو بینر لکھݨ کیتے انہاں دا خرچہ تے ویلھا بچ سڳے ، پیپلز پارٹی دے دور اچ اداریں کوں نیست و نابود کیتا ڳیا ، اساں 60 توں ودھ اداریں دے سربراہان میرٹ تے لاتے ، اڄ ادارے اپݨے پیراں تے کھڑے تھیندے پئن ۔اے ڳالھ انہاں اتوار کوں اتھاں پریس کانفرنس توں خطاب کریندے ہوئیں آکھی اے ۔ چوہدری فواد حسین آکھیے جو اساں صحافیاں دے مسئلیں دے حل دی پوری کوشش کیتی ، سارے صحافیاں تے ورکرز کوں ادائیگیاں یقینی بݨاوݨ کیتے اساں صحافتی اداریں کوں بقایا جات ادا کیتے۔ انہاں آکھیے جو پاکستان میڈیا ڈویلپمنٹ اتھارٹی بݨاوݨ دا مقصد ایہو اے جنہاں صحافیاں بالخصوص الیکٹرانک میڈیا دے صحافیاں دے نال معاہدے دی پاسداری نی تھیندی پئی اے تے انہاں کوں ایندے تے عمل درآمد کیتے قانونی حق مل سڳے ۔ انہاں آکھیے جو بجٹ اچ گھٹ توں گھٹ اجرت 20 ہزار روپے مقرر کیتی ڳئی اے ، سارے صحافتی اداریں تے لازم اے جو او اپݨے ورکرز دیاں تنخواہیں اچ ایندے مطابق اضافہ کرن۔ وفاقی وزیر اطلاعات آکھیے جو ایں ویلھے کراچی اچ ماسوائے انہاں علاقیں دے جتھاں ریکوری دے مسئلے ہن ، لوڈ شیڈنگ نی تھیندی اے ، کے الیکٹرک کوں پنج سو میگاواٹ اضافی بجلی فراہم کیتی تاں جو کراچی دے شہریاں کوں گرم موسم اچ تکلیف دا سامݨا نہ کرݨا پووے۔ انہاں آکھیے جوکراچی دے شہریاں کوں سہولت ݙٰوݨ کیتے حکومت خصوصی انتظامات کیتن۔ چوہدری فواد حسین آکھیے جو وزیراعلیٰ سندھ بدقسمتی نال قوم پرست سیاست کر یندے پئن ،او ذوالفقار علی بھٹو شہید اتے بے نظیر بھٹو شہید دی سیاست توں خود کوں علیحدہ کریندے پن جیں دے نتیجے اچ تعصب کھنڈایا ویندا پئے سندھ کوں گزریل سالاں دے تقریباً 16 توں 18 ارب روپے وفاق ولوں ملئن۔
