سکردو ۔ 21 اگست (اے پی پی) صدر مملکت ممنون حسین آکھے جو گلگت بلتستان دے پانڑیں دے ذخیریاں توں بھرپور فیدہ چاونڑ سانگے علاقے کوں نیشنل گرڈ نال جوڑنڑ لازمی ہے اتے ایندے کیتے سارے ضروری انتظامات تکھے پورے کیتے ویسن۔ ۔ صدر مملکت اے گالھ گلگت بلتستان اچ پانڑیں تے بجلی دے منصوبیاں بارے بریفنگ دے موقعے تے آکھی ۔ ایں موقعے تے گورنر میر غضنفر علی ، وزیر اعلی حافظ حفیظ الرحمان ، پانڑیں تے بجلی دے صوبائی وزیر حاجی اکبر تابان اتے بئے اعلی حکام موجود ہن ۔ صدر مملکت آکھیا جو گلگت بلتستان کوں نیشنل گرڈ نال جوڑنڑ نال علاقے اچ ترقی دی رفتار تیز تھی ویسی ۔ انھاں آکھیا جو معاشی ترقی دے فیدے لوکیں تئیں پجاونڑ کیتے بجلی دی پیدا وار اچ ودھارا اتے ایندا قومی ٹرانسمیشن لائن نال جوڑنڑ لازمی ہے ۔ صدر مملکت آکھیا جو پاک چین اقتصادی راہداری دے موقعے توں بھرپور فیدہ چاونڑ سانگے بجلی دے معاملیاں اچ خود کفیل ہونڑ لازمی ہے ۔
