اسلام آباد ۔16 اکتوبر (اے پی پی)صدر مملکت ممنون حسین آکھے جو کشمیر پاکستان دی شہ رگ ہے ، پاکستان کشمیریاں دے حق خودارادیت دے حصول دی جدوجہد دی اخلاقی ، سفارتی اتے سیاسی حمایت جاری رکھیسی ۔ اے گالھ انہاں آل پارٹیز حریت کانفرنس آزاد جموں و کشمیر شاخ دے وفد نال اتوار کوں مظفر آباد اچ ملاقات دے دوران آکھی ۔ایںموقعے تے آزاد جموں و کشمیر دے صدر سردار محمد مسعود خان اتے وزیر اعظم راجہ فاروق حیدر خان وی موجود ہن ۔ آل پارٹیز حریت کانفرنس دے وفد نال ملاقات دے موقعے تے صدر ممنون حسین بین الاقوامی برادری اتے اقوام متحدہ توں مطالبہ کیتے جو او کشمیربارے رائے شماری دے حوالے نال اقوام متحدہ دیاں قرار داداں تے عملدرآمد کیتے بھارت اُتے دباﺅ پاون۔ انہاں آکھیا جو عالمی برادری کوں مقبوضہ کشمیر اچ تریمتیں اتے بالیں سمیت معصوم کشمیریاں تے ڈھائے ونجنڑآلے مظالم اتے انسانی حقوق دیاں خلاف ورزیاں دا فوری خاتمہ کراونڑ اتے ایں بارے بھارت اُتے دباﺅ پاونڑ کیتے آپنڑاں کردارادا کرنڑاں چاہیدے ۔ صدر 69سال پرانڑیں تنازعے دے حل کیتے اقوام متحدہ دی ناکا می تے افسوس دا اظہار کیتا اتے اقوام متحدہ توں مطالبہ کیتا جو او خطے اچ دیرپا امن اتے سلامتی کیتے کشمیر دے جھیڑے کوں مکاونڑ سانگے اقوام متحدہ دیاں قرارداداں تے عملدرآمد کوں یقینی بنڑاونڑ کیتے آپنڑاں کردار ادا کرے ۔ صدر مملکت آکھیا جو پاکستان مذاکرات دے ذریعے تنازعہ کشمیر دا پرامن حل چاہندے ۔ صدر مملکت مسلمان ملکاں اُتے زور ڈتا جو او آپنڑیں آپس دے جھیڑیاں کوں ملکا تے ہک مٹھ تھی ونجن، اتے لمبے عرصے توں جاری فلسطین اتے کشمیر دے مسلیاں کوں مکاونڑ کیتے بین الاقوامی برداری تے دباﺅ پاون۔ صدر مملکت آکھیا جو او وزارت خارجہ کوں ہدایت کریسن جو او غیر ملکی سفارت کاراں کوں کشمیر بارے باقاعدگی نال ڈساون تانجو کشمیر دے جھیڑے دے فوری حل کوں یقینی بنڑایا ونج سگے۔ انہاں وزارت خارجہ کوں بیا ہدایت کیتی جوا و کشمیری عوام کوں خوراک اتے دوایاں دی فوری فراہمی دی لوڑ بارے وی بین الاقوامی انسانی حقوق دے اداریاں کوں ڈساون۔
