اسلام آباد ۔ 19 دسمبر (اے پی پی) وزیراعظم محمد نواز شریف انہاں جاہیں تے صنعتی علاقیاں دے قیام دی ہدایت کیتی ہے جیہڑے اقتصادی طور تے موزوں ہوون اتے انہاں توں پاکستان اتے چین ڈوہائیں کوں ودھ توں ودھ معاشی فیدے تھیسن۔ سنوار کوں وزیراعظم ہاﺅس اچ پاک چین اقتصادی راہداری دے تحت مختلف منصوبہ جات تے اگوہیں بارے جائزہ اجلاس دی صدارت کریندے ہوئیں وزیراعظم انہاں جاہیں دی اقتصادی اہمیت اتے فیدے بارے چینی حکومت کوں تجویزاں ڈیونڑ سانگے ہک کمیٹی وی بنڑائی ہے ۔ انہاں آکھیا جو چین اہم موڑ تے اقتصادی بحالی کیتے پاکستان دی بہوں ساری مدد کیتی ہے جیندے اُتے پاکستان دی حکومت اتے عوام چینی قیادت اتے لوکیں دے مشکور ہن ۔ وزیراعظم آکھے جو چین اتے پاکستان آپ دے لمبی مدت دے سٹریٹجک گانڈے کوں مضبوط اتے پائیدار اقتصادی سانجھے داری اچ ڈھال ڈتے ۔ جیندے نال ڈوہائیں ملکاں کوں بہوں فیدہ تھیسی۔ اجلاس دے دوران توانائی، ٹرانسپورٹ، انفراسٹرکچر اتے صنعتی منصوبیاں کیتے رکھے گئے ہد ف دا جائزہ گھد گیا۔ اجلاس اچ ڈسایا گئے جو سڑک، ریل، ہوا بازی اتے ڈیٹا کنکٹویٹی سمیت بنیادی ڈھانچے دے منصوبیاں تے تیزی نال کم کیتا ویندا پئے ۔ اجلاس اچ وفاقی وزیر خزانہ اسحاق ڈار، وزیر منصوبہ بندی تے ترقی احسن اقبال، وزیر پانڑیں تے بجلی خواجہ محمد آصف، وزیر بندرگاہیں تے جہاز رانی میر حاصل بزنجو، وزیراعلی پنجاب شہباز شریف، وزیراعظم دے معاون خصوصی طارق فاطمی اتے بئے اعلیٰ حکام شرکت کیتی۔
