وزیر اعظم شاہد خاقان عباسی افغان صدر محمد اشرف غنی دی دعوت تے (اج)کابل دا دورہ کریسن وزیراعظم افغان قیادت دے سانجھے تعاون ، مہاجراں دی واپسی، منشیات دی پیداوار تے نقل وحمل کوں روکنڑ ، افغان امن عمل اتے علاقائی سیاسی تے سکیورٹی صورتحال سمیت سانجھی دلچسپی دے امور تے تفصیلی مشاورت کریسن ،ترجمان دفترخارجہ

اسلام آباد ۔ 5 اپریل (اے پی پی) وزیر اعظم شاہد خاقان عباسی افغان صدر محمد اشرف غنی دی دعوت تے (اج) جمعے کوں کابل دا ہک ڈینھ دا دورہ کریسن ۔وزیر اعظم دے افغانستان دے دورے دا مقصد ڈوطرفہ تعلقات اچ مثبت پیشرفت کو ںتقویت ڈیونڑ تے ڈوہیں ملکاں دے خطے اچ پائیدا ر امن ،استحکام تے اقتصادی خوشحالی دی جستجو اچ سانجھی کاوش کوں مضبوط بنڑاونڑ اچ معاونت کرنڑاں اے ۔ترجمان دفتر خارجہ ولوں خمیس کوں جاری بیان دے مطابق وزیراعظم دا دورہ افغانستان اچ پائیدار امن واستحکام سانگے طالبان دے نال صدر اشرف غنی دی پیش کش دے حوالے نال پاکستان دی حمایت تے ڈو پاسے رابطے کوں مستحکم کرنڑ دے تناظر اچ ہے۔ وزیراعظم افغان صدر اشرف غنی اتے چیف ایگزیکٹو ڈاکٹر عبداللہ عبداللہ دے نال ڈو پاسے سیاسی، اقتصادی، سلامتی اتے انسداددہشت گردی تعاون ،افغان مہاجراں دی واپسی ، منشیات دی پیداوار تے نقل وحمل کوں روکنڑ، افغان امن عمل اتے علاقائی سیاسی و سکیورٹی صورتحال سمیت سانجھے دلچسپی دے امور تے تفصیلی مشاورت کریسن ۔بیان دے مطابق پاکستان افغانستا ن اچ بنیادی ڈھانچے، تعلیم اتے صحت دے شعبیں اچ استعداد کار اچ ودھارے دے ذریعے افغانستان دیاں ترقیاتی کاوشاں اچ معاونت جاری رکھیسی۔ ایں ضمن اچ وزیر اعظم افغان قیادت دے نال ڈوہیں ملکاں وچال سفری سہولتاں دے طریقیں ،تعلیمی معاونت اتے پاکستان اچ افغان شہریاں دی طبی سہولت اتے ڈوہیں ملکاں وچال تجارت اتے راہدری سہولت کوں وسعت ڈیونڑ تے گال بات کریسن ۔ علاقائی اقتصادی ہم آہنگی دے ودھارے سانگے ڈوہیں ملکاں ترکمانستان، افغانستان، پاکستان، بھارت گیس پائپ لائن اتے سنٹرل ایشیائ، جنوبی ایشیائ، الیکٹرک سٹی ٹرانسمیشن اتے ٹریڈ پروجیکٹ (کاسا 1000) جیہوجے اہم علاقائی اقدامات اچ شرکت کریندے پن ۔وزیر اعظم شاہد خاقان عباسی کجھ عرصہ پہلے ہی (تاپی) گیس منصوبے دی افتتاحی تقریب اچ ہرات اچ افغان صدر دے نال شرکت کیتی ہئی ۔ ڈوہیں پاسے اہم ریل روڈ مواصلاتی منصوبیں اچ وی مصروف عمل ہن ۔