مشرقِ وسطیٰ وچ امن کیتے پاکستان بہترین کردار نٻھیندا پئے، وفاقی وزیرِ خزانہ محمد اورنگزیب دیاں ملاقاتاں اتے انٹرویو

اسلام آباد: 15 اپریل (اے پی پی)وفاقی وزیرِ خزانہ اتے محصولات سینیٹر محمد اورنگزیب آکھیے جو سفارت کاری ہک واقعے دی بجائے ہک مکمل عمل اے، مشرقِ وسطیٰ اچ امن مذاکرات دے حوالے نال پاکستان اپݨا کردار احسن طریقے نال ادا کریندا پئے۔ آئی ایم ایف پروگرام دے بنیادی فریم ورک تے عمل درآمد کیتے پرعزم ہیں، موجودہ بیرونی جھٹکیاں پاروں اے پروگرام استحکام اتے مارکیٹ دے اعتماد دا ہک  معتبر ذریعہ اے۔ انہاں اے ڳالھ آئی ایم ایف اتے عالمی بینک دے سالانہ اجلاس دے موقع تے واشنگٹن ڈی سی اچ اعلیٰ سطح دی ملاقاتاں اتے تقریباں نال خطاب اچ آکھی۔ سینیٹر محمد اورنگزیب آئی ایم ایف دے فرسٹ ڈپٹی منیجنگ ڈائریکٹر ڈین کیٹز نال ملاقات کیتی۔ وزیرِ خزانہ آئی ایم ایف ٹیم دا شکریہ ادا کیتا اتے ݙسایا جو اسٹاف لیول معاہدہ کامیابی نال تھی چکیے اتے ہݨ آئی ایم ایف بورڈ دی منظوری دا انتظار اے۔ وزیرِ خزانہ جاری تنازع دے پاکستان دی معیشت تے اثرات، خاص طور تے توانائی دی خریداری اتے لاجسٹکس دے چیلنجز بارے بریفنگ ݙتی۔ انہاں آکھیا جو حکومت طلب دے انتظام اتے مالیاتی طور تے غیر جانبدار ہدفی سبسڈیز دے ذریعے غریب طبقے دا تحفظ یقینی بݨاوݨ دی پالیسی تے عمل کریندی پئی اے۔ وزیرِ خزانہ آئی ایم ایف دے پینل مباحثے “جنگ دے دوران معیشتاں” اچ شرکت کریندے ہوئے مشرقِ وسطیٰ دے تنازع کوں تاریخ دا وݙا سپلائی شاک قرار ݙتا۔ انہاں ݙسایا جو پچھلے 25 توں 30 ݙینہاں اچ کراچی پورٹ تے ٹرانس شپمنٹ دی مقدار پچھلے پورے سال توں زیادہ رہی اے، جیڑھی ہک مثبت پیش رفت اے۔ سینیٹر محمد اورنگزیب واشنگٹن اچ “روشن ڈیجیٹل اکاؤنٹ” روڈ شو نال وی خطاب کیتا۔ انہاں سمندر پار پاکستانیاں کوں معیشت دا اہم ستون قرار ݙیندے ہوئے آکھیا جو مشکل حالات اچ وی روشن ڈیجیٹل اکاؤنٹس دی رقوم تے کوئی پابندی کائنی لائی ڳئی۔ انہاں ٻاہرلے ملک بیٹھے پاکستانیاں کوں پاکستان اچ سرمایہ کاری کرݨ دی دعوت ݙتی۔ وزیرِ خزانہ امریکی وزیرِ تجارت ہاورڈ لٹنک نال وی ملاقات کیتی جیندے اچ کان کنی، توانائی تے آئی ٹی دے شعبیاں اچ تعاون ودھاوݨ تے ڳالھ مہاڑ تھئی۔ بعد اچ سی این بی سی کوں انٹرویو ݙیندے ہوئے مشرقِ وسطیٰ اچ جنگ دے خاتمے کیتے پاکستان دی ثالثی بارے وزیرِ خزانہ آکھیا جو سفارت کاری ہک مسلسل عمل اے اتے پاکستان دی قیادت ایں حوالے نال مخلصانہ کوششاں کریندی پئی اے۔ انہاں آکھیا جو امریکہ اتے ایران ݙوہیں پاکستان دی کوششاں کوں منیندن، ایران تے امریکہ 50 سال بعد کٹھے بیٹھن جیڑھی ہک وݙی کامیابی اے، اتے امید اے جو اے مذاکرات کامیاب تھیسن کیوں جو اڳو تے ودھݨ دا رستہ صرف سفارت کاری اے۔