وزیر اعظم شہباز شریف دی سعودی ولی عہد محمد بن سلمان نال ڈو گھنٹے تئیں ملاقات

جدہ۔ 16 اپریل(اے پی پی)وزیر اعظم محمد شہباز شریف سعودی ولی عہد اتے وزیر اعظم شہزادہ محمد بن سلمان کوں پاکستان دی امن کیتے کوششاں تے اعتماد اچ ڳھندے معاشی استحکام کیتے سعودی عرب دی مسلسل حمایت دی تعریف کیتی اتے آکھیے جو پاکستان اتے سعودی عرب وچال نویکلے تعلقات ہین، ݙوہیں ملک باہمی دفاعی معاہدے دے تحت تزویراتی (اسٹریٹجک) شراکت دار ہین۔ سعودی ولی عہد شہزادہ محمد بن سلمان امن کیتے مذاکرات سانڳے وزیر اعظم شہباز شریف اتے فیلڈ مارشل سید عاصم منیر دے تعمیری کردار دی تعریف کیتی۔ وزیر اعظم محمد شہباز شریف اتے سعودی عرب دے ولی عہد و وزیر اعظم شہزادہ محمد بن سلمان بن عبدالعزیز السعود دی ملاقات اچ نائب وزیر اعظم اتے وزیر خارجہ سینیٹر محمد اسحاق ڈار وی موجود ہن۔ وزیر اعظم آفس دے میڈیا ونگ توں جاری بیان دے مطابق، تقریباً ݙو گھنٹے تئیں جاری رہوݨ والی ملاقات اچ ݙوہیں رہنماواں ابھردی ہوئی علاقائی صورتحال تے تفصیلی ڳالھ مہاڑ کیتی۔ وزیر اعظم حالیہ علاقائی کشیدگی پاروں مملکت سعودی عرب کیتے پاکستان دی مکمل یکجہتی اتے حمایت دا اظہار کیتا۔ انہاں قیمتی جاناں دے ضیان تے افسوس کریندے آکھیے جو پاکستانی عوام اپݨے سعودی بھراواں دے نال مونڈھے نال مونڈھا رلا تے کھڑن۔ وزیر اعظم سعودی عرب ولوں ولی عہد دی قیادت اچ مثالی صبر اتے تحمل دی تعریف کیتی جیڑھا موجودہ بحران اچ سعودی عرب اتے اوندے توں ٻاہرو سارے امن پسند لوکاں کیتے طاقت دا باعث اے۔ وزیر اعظم سعودی ولی عہد کوں پاکستان دی امن کوششاں بارے اڄوکی پیش رفت دا ݙسایا جیندے نال امریکہ اتے ایران وچال مذاکرات دے بعد جنگ بندی تھئی اے۔ سعودی ولی عہد شہزادہ محمد بن سلمان امن دے ایں عمل اچ وزیر اعظم شہباز شریف اتے فیلڈ مارشل سید عاصم منیر دے تعمیری کردار کوں سراہیا۔ ݙو طرفہ معاملیاں تے الیندے وزیر اعظم پاکستان دے معاشی استحکام کیتے مملکت سعودی عرب دی مسلسل حمایت تے سعودی ولی عہد دا شکریہ ادا کیتے۔ وزیر اعظم آکھیا جو پاکستان اتے مملکت سعودی عرب وچال نویکلے تعلقات ہن، ݙوہیں ملک پاکستان-سعودی عرب اسٹریٹجک باہمی دفاعی معاہدے دے تحت اسٹریٹجک دفاعی شراکت دار ہین۔ ڈوہیں رہنماواں باہمی دلچسپی دے معاملیاں تے قریبی تعاون جاری رکھݨ کیتے مشترکہ عزم دوہرایا۔