پاکستان دا ثقافتی ورثہ کثیر الجہتی تہذیب و تمدن نال بھریا ہوئے، وزیراعظم دا عالمی یومِ ثقافتی ورثہ تے سنیہا

اسلام آباد۔ 18 اپریل (اے پی پی)وزیر اعظم محمد شہباز شریف ثقافتی ورثے کوں سماجی تنوع اتے ماضی دا امین قرار ݙیندے آکھیے جو پاکستان دا ثقافتی ورثہ کثیر الجہتی تہذیب و تمدن نال جڑیا ہوئے جیندے اچ قدیم ترین تہذیباں دے رنگ لکیے ہوئن۔ ثقافتی ورثہ تے ڄڳ ݙیہاڑے تے اپݨے سنیہے اچ وزیر اعظم آکھیے جو پاکستان اڄ اقوامِ عالم دے نال آواز رلا تے ثقافتی ورثے دا خاص ݙینہہ منیندا پئے،اڄ اساں مشترکہ ثقافتی ورثے ڄھئیں قیمتی اثاثے دے تحفظ کیتے کوششاں کرݨ آلے لوکاں کوں خراج تحسین پیش کریندے ہیں۔ انہاں آکھیا جو عالمی سطح تے ثقافتی ورثے کیتے انڄھ ݙینہہ مقرر کرݨ ایندی اہمیت کوں ظاہر کریندے۔ انہاں آکھیا جو پاکستان دا ثقافتی ورثہ کثیر الجہتی تہذیب و تمدن نال مالا مال اے، پاک سرزمین دنیا دی قدیم ترین تہذیباں دے رنگ نال سجی ہوئی اے ڄیڑھا انسانی تخلیقی صلاحیت اتے تنوع دی سوھݨی مثال اے۔ انہاں آکھیا جو ثقافتی قصے کہانیاں، زبانی روایات، موسیقی، دستکاری اتے علاقائی زباناں معاشرے دی زندہ دلی اتے روح دی تازگی کوں برقرار رکھدن۔ وزیر اعظم آکھیا جو حکومتِ پاکستان توجہ طلب ثقافتی ورثے دی یونیسکو (UNESCO) دی حفاظتی لسٹ اچ شمولیت کیتے ودھ کوششاں کریندی پئی اے، ورثے کوں دستاویزی شکل اچ محفوظ ٻݨاوݨ، ڈیجیٹل ثقافتی پلیٹ فارمز دے قیام کیتے ودھ وی سرمایہ کاری تھیندی پئی اے تاں جو روایات دا تحفظ، ورثے کوں عالمی سطح تے ثقافتی سفارتکاری، سیاحت دی ترقی اتے نوجوان نسل دے نال تعلقات کوں ودھاوݨ یقینی ٻݨایا ونڄے۔ اڄ دے ݙینہہ اپیل کریندے ہیں جو سارے پاکستانی خاص کر نینگر اپݨے ثقافتی ورثے تے ماݨ کرن اتے ایندے تحفظ و ودھارے کیتے اجتماعی کردار ادا کرن۔