ملک اچ انسدادِ پولیو مہم مک ڳئی، 4 کروڑ 47 لکھ ٻالاں کوں قطرے پلائے ڳئن

اسلام آباد۔ 20 اپریل (اے پی پی) ملک اچ انسدادِ پولیو مہم مک ڳئی، ایں دوران ملک اچ 4 کروڑ 47 لکھ توں ودھ ٻالاں کوں پولیو توں بچاؤݨ دے قطرے پلائے ڳئن۔ نیشنل ایمرجنسی آپریشن سینٹر (این ای او سی) دے مطابق اے ہدف پولیو ورکرز دی انتھک محنت تے گھر گھر رسائی دی بدولت حاصل کیتا ڳئے ۔ این ای او سی بیان اچ آکھیا اے جو مہم دے دوران ٻالاں کوں پولیو ویکسین دے نال وٹامن اے دی اضافی خوراک وی ݙتی ڳئی اے۔اعداد و شمار دے مطابق پنجاب اچ 2 کروڑ 30 لکھ توں ودھ، سندھ اچ 1 کروڑ 4 لکھ توں ودھ، خیبرپختونخوا اچ 72 لکھ 22 ہزار توں ودھ تے بلوچستان اچ 26 لکھ 20 ہزار توں ودھ ٻالاں کوں پولیو توں بچاؤݨ دے قطرے پلائے ڳئن۔ ایویں ہی اسلام آباد اچ 4 لکھ 41 ہزار توں ودھ، گلگت بلتستان اچ 2 لکھ 92 ہزار توں ودھ جݙاں جو آزاد کشمیر اچ تقریباً 7 لکھ 17 ہزار ٻالاں کوں قطرے پلائے ڳئن۔ نیشنل ایمرجنسی آپریشن سینٹرموجب مہم دی کامیابی اچ والدین تے مقامی کمیونٹی بھرپور تعاون کیتے۔ ادارے سکیورٹی اداریں دے وقتی تے مؤثر تعاون دی تعریف کریندے انھاں دی خدمات کوں خراجِ تحسین پیش کیتے