یومِ چینی زبان دنیا اچ لسانی تفہیم دی عالمی اہمیت کوں اجاگر کریندے، صدرِ مملکت دا پیغام

اسلام آباد۔ 20 اپریل (اے پی پی) صدرِ مملکت آصف علی زرداری آکھیے جو یومِ چینی زبان ہک ایجھی دنیا اچ جیڑھی تکھے ہک ٻئے نال جڑدی پئی اے، لسانی تفہیم دی عالمی اہمیت کوں اجاگر کریندی اے۔ ایوانِ صدر دے پریس ونگ توں جاری یومِ چینی زبان دے موقع تے اپݨے پیغام اچ صدرِ مملکت آصف علی زرداری آکھیا جو پاکستان اچ چینی زبان سکھݨ اچ دلچسپی اچ مسلسل اضافہ تھئے، خاص طور تے جامعات اچ جتھاں ہݨ باقاعدہ تدریسی پروگرام قائم تھی چکئن۔ کراچی یونیورسٹی تے پنجاب یونیورسٹی جہھے اداریں دے نال نال ’نیشنل یونیورسٹی آف ماڈرن لینگویجز‘ (نمل) اچ وی طلبہ کوں درجہ بندی دے مطابق تدریس، سرٹیفیکیشن کورسز تے ثقافتی آگاہی دے موقع ݙتے ویندے پئن۔انھاں آکھیا جو سندھ اچ کراچی یونیورسٹی دا ’کنفیوشس انسٹی ٹیوٹ‘ چینی زبان دی تعلیم دے ہک وݙے مرکز دے طور تے کم کریندا پئے جتھاں مقامی تے چینی اساتذہ دی زیرِ نگرانی منظم کورسز تے تربیت ݙتی ویندی پئی اے ۔ صدرِ مملکت آکھیا جو زبان سکھݨ دے ایں عمل اچ انھاں سرکاری ملازمین دی خصوصی تربیت وی شامل اے جنھاں دے فرائض اچ چینی شہریاں دے نال ہم آہنگی پیدا کرݨ شامل اے۔ ٻہوں سارے نینگراں کیتے چینی زبان سکھݨ ہݨ محض شوق کائنی بلکہ تعلیم، تجارت تے تکنیکی تعاون دے مواقع نال جڑیا ہویا اے۔ جیویں جیویں اے کم اڳوں ودھدا پئے، ساری توجہ ایں ڳالھ تے مرکوز رہݨی چاہیدی اے جو زبان دی تعلیم تائیں رسائی سوکھی تے منظم ہووے تاں جو اے حقیقی ضرورتاں کوں پورا کرے تے ݙوہیں ملکاں وچال عملی تعاون کوں مزید مستحکم بݨا سڳے۔