وفاقی وزیرِ داخلہ محسن نقوی دی زیرِ صدارت اجلاس، مارگلہ دے دامن اچ نواں پارک تے فائیو اسٹار ہوٹلز دی تعمیر دا فیصلہ

اسلام آباد۔ 21 اپریل (اے پی پی) وفاقی وزیرِ داخلہ محسن نقوی دی زیرِ صدارت سی ڈی اے ہیڈ کوارٹرز اچ ہک اعلیٰ سطح دا اجلاس منعقد تھیا جیندے اچ اسلام آباد کوں عالمی معیار دا شہر بݨاوݨ کیتے کئی وݙے تے اہم ترین فیصلے دی منظوری ݙتی ڳئی اے۔ اجلاس اچ وفاقی دارالحکومت اچ جاری ترقیاتی منصوبیں تے مستقبل دی حکمتِ عملی دا تفصیلی جائزہ ڳھدا ڳئے۔ وزیرِ داخلہ واضح کیتا جو حکومت دا مقصد اسلام آباد کوں ہک مثالی شہر اچ بدلݨ اے جتھاں شہریاں کوں بین الاقوامی معیار دیاں جدید سہولتاں تے تفریحی موقع میسر ہوون۔ایں مشن دے تحت مارگلہ پہاڑی دے دامن اچ ہک ہزار ایکڑ رقبے تے محیط ہک وسیع تے جدید پارک تعمیر کرݨ دا فیصلہ کیتا ڳئے جیڑھا شہر دی خوبصورتی تے ماحولیات اچ اضافہ ثابت تھیسی۔ ایندے نال نال وفاقی وزیرِ داخلہ سیاحت تے سرمایہ کاری دے ودھارے کیتے “زیرو ٹیکس” تے مبنی نویں ہوٹل پالیسی مرتب کرݨ دے احکامات جاری کیتن۔ انتظامی اصلاحات دے حوالے نال فیصلہ کیتا ڳیا جو اسلام آباد دے سارے رقبے تے جائیداداں دا “سروے آف پاکستان” دے ذریعے مکمل سروے کرایا ویسی ۔ ادارہ جاتی کارکردگی ودھاوݨ کیتے سی ڈی اے اچ غیر ضروری آسامیاں کوں ختم کرݨ دا وی فیصلہ کیتا ڳئے۔