اسلام آباد۔ 22 اپریل (اے پی پی) صدرِ مملکت آصف علی زرداری موسمیاتی تبدیلیاں دا مقابلہ کرݨ، جنگلاں دے تحفظ، پاݨی دی بچت تے قابلِ تجدید توانائی دے ودھارےکیتے پالیسیاں کوں مزید مستحکم کرݨ دی لوڑھ تے زور ݙیندے آکھیے جو صاف ستھرا تے ساوا پاکستان نہ صرف ہک لوڑھ اے بلکہ ساݙا او فرض اے جیڑھا اساں اپݨی آوݨ آلی نسلاں کیتے ادا کرݨا اے۔ایوانِ صدر دے پریس ونگ …
صدرِ مملکت آصف علی زرداری دا زمین دے جگ ݙیھاڑتے سنھیا
اسلام آباد۔ 22 اپریل (اے پی پی) صدرِ مملکت آصف علی زرداری موسمیاتی تبدیلیاں دا مقابلہ کرݨ، جنگلاں دے تحفظ، پاݨی دی بچت تے قابلِ تجدید توانائی دے ودھارےکیتے پالیسیاں کوں مزید مستحکم کرݨ دی لوڑھ تے زور ݙیندے آکھیے جو صاف ستھرا تے ساوا پاکستان نہ صرف ہک لوڑھ اے بلکہ ساݙا او فرض اے جیڑھا اساں اپݨی آوݨ آلی نسلاں کیتے ادا کرݨا اے۔ایوانِ صدر دے پریس ونگ موجب صدرِ مملکت اے ڳالھ زمین دے جگ ݙیھاڑ (مدر ارتھ ڈے) دے موقع تے اپݨے سنھیے اچ آکھی اے۔ انھاں آکھیا جو اے ݙینھ اساں کوں زمین دے تحفظ تے قدرتی وسائل کوں آوݨ آلی نسلاں کیتے محفوظ بݨاوݨ دی سانجھی ذمہ واری یاد ݙویندے۔ پاکستان انھاں درپیش ماحولیاتی چیلنجز توں بخوبی آگاہ اے جنھاں اچ موسمیاتی تبدیلی دے اثرات توں گھن تے ساݙے قدرتی ماحولیاتی نظام دی تنزلی تے ناگہانی چھل توں گھن تے لینڈ سلائیڈنگ تئیں شامل ہن۔صدرِ مملکت آکھیا جو بحیثیت ہک قوم اساں چھل، خشک سالی تے شدید موسمی حالات دے تباہ کن نتیجے ݙٹھن، اے محض آوݨ آلے خطرات کائنی بلکہ موجودہ حقائق ہن جیڑھے ساݙے عوام دی زندگیاں تے روزگار کوں براہِ راست متاثر کریندن۔ انھاں آکھیا جو پاکستان کیتے میݙا وژن ہمیشہ پائیدار ترقی تے ماحولیاتی تحفظ دے اصولاں تے مبنی رہیے۔ میݙے پچھلے دورِ حکومت اچ بینظیر بھٹو شہید یوتھ ڈویلپمنٹ پروگرام جیھے اقدامات جنھاں اچ شجرکاری دی وسیع مہم شامل ہئی، ہک ساوے پاکستان کیتے ساݙے عزم کوں ظاہر کریندن۔صدر آکھیا جو اساں کوں انھاں کوشِشاں کوں بنیاد بݨیندے اڳوں ودھݨا چاہیدے تے موسمیاتی تبدیلیاں دا مقابلہ کرݨ، جنگلاں دے تحفظ، پاݨی دی بچت تے قابلِ تجدید توانائی دے ودھارے کیتے اپݨی پالیسیاں کوں مزید مستحکم کرݨا چاہیدے۔ صدرِ مملکت آکھیا جو میں ایں مقصد کیتے اپݨے عزم دی تجدید کرینداں تے ہر شہری، کمیونٹی تے ادارے توں مطالبہ کرینداں جو او اپݨا کردار ادا کرن ۔ انھاں آکھیا جو آؤ اساں ودھ توں ودھ وݨ لاوݨ، پلاسٹک دا استعمال گھٹ کرݨ، پائیدار طریقیں کوں اپناوݨ تے اپݨے نینگراں کوں ماحولیاتی تحفظ دی اہمیت ڈساوݨ دا عہد کروں۔صدرِمملکت آصف علی زرداری آکھیا جو ہک صاف ستھرا تے ساوا پاکستان نہ صرف ہک لوڑھ اے بلکہ ساݙا او فرض اے جیڑھا اساں اپݨی آوݨ آلی نسلاں کیتے ادا کرݨا اے۔ انھاں آکھیا جو اساں رل تے ہک ایجھی خوشحال قوم دی تعمیر کرسڳدوں جیڑھی فطرت دے نال ہم آہنگ ہووے، آؤ اساں رل تے ایں ڳالھ کوں یقینی بݨاؤں تاں جو پاکستان سوہݨا، خوشحالی تے امید دی سرزمین دا استعارہ بݨے
