وزیراعظم محمد شہباز شریف دا زمین دے جگ ݙیھاڑ تے سنھیا

اسلام آباد۔ 22 اپریل (اے پی پی) وزیراعظم محمد شہباز شریف زمین تے ایندے ماحول دے تحفظ کیتے عالمی سطح تے موثر بین الاقوامی تعاون تے اجتماعی حکمتِ عملی کوں ناگزیر قرار ݙیندے آکھیے جو حکومتِ پاکستان قدرتی زمینی وسائل، نباتات تے ماحول دے تحفظ تے موسمیاتی تبدیلی روکݨ کیتے قابلِ تجدید توانائی دے ودھارے سودھے ٻہوں اقدامات کریندی پئی اے۔ اڄ  منائے ونڄݨ آلے زمین دے جڳ ݙیھاڑ دی مناسبت نال اپݨے پیغام اچ وزیراعظم محمد شہباز شریف آکھیا جو پاکستان اڄ بھرپور تے پرعزم انداز اچ زمین دا عالمی ݙینھ منیندا پئے، اے ݙینھ زمین دی ناگزیر اہمیت کوں اجاگر کریندے تے ایندے تحفظ دی اجتماعی ذمہ واری دا احساس وی ݙویندے۔وزیراعظم دفتر دے میڈیا ونگ توں جاری بیان موجب وزیراعظم آکھیا جو زمین دے قدرتی وسائل انسانی زندگی دی موجودگی تے نشو و نما دی ضمانت ہن، زمین نباتات و حیوانات ہر طرح دی زیست کوں پروان چڑھیندی اے، اڄ کرہ ارض کوں موسمیاتی تبدیلی سودھے مختلف ماحولیاتی چیلنجز درپیش ہن جیڑھے ایندے قیمتی قدرتی وسائل، موسمی تغیر تے معیارِ زندگی تے اثرات مرتب کریندے پئن۔ انھاں آکھیا جو پاکستان موسمیاتی تبدیلی دے متاثرین اچ نمایاں اے، اے صورتحال زمین دے قدرتی خدوخال دے تحفظ دے عزم کوں ٻیا وی پختہ کریندی اے۔ وزیراعظم آکھیا جو آؤ اڄ انفرادی تے اجتماعی طور تے تجدیدِ عزم کروں جو ماحولیاتی تحفظ تے زمین دی ݙیکھ بھال کیتے ہر ممکن فرض ادا کریسوں تاں جو نویں نسل کیتے صحت افزاء ماحول کوں یقینی بݨایا ونڄ سڳے، ایہو ای خوشحال مستقبل دی ضمانت اے