سپریم کورٹ ملٹی لوکیشن سماعتاں دا موثر نظام نافذ کر ݙتے

اسلام آباد۔ 22 اپریل (اے پی پی) سپریم کورٹ آف پاکستان شفاف، قابلِ رسائی تے عوام دوست نظامِ انصاف دے قیام دی طرف اہم پیش رفت کریندے جدید ٹیکنالوجی کوں عدالتی نظام اچ کامیابی نال ضم کر ݙتے، جیندے ذریعے ملک اچ انصاف ݙیوݨ دے طریقے کوں نویں جہت مل ڳئی اے۔جاری پریس ریلیز موجب عدالتِ عظمیٰ ملٹی لوکیشن سماعتاں دا موثر نظام نافذ کر ݙتے جیندے تحت ججز، وکلاء تے فریقین بغیر جغرافیائی رکاوٹاں دے مختلف شہراں توں ہکے ویلھے عدالتی کارروائی اچ حصہ گھن سڳدن ۔ اڄوکی ہک اہم سماعت اچ بینچ اسلام آباد اچ موجود ہئی جݙاں جو وکلاء کوئٹہ، حیدرآباد تے کراچی توں ویڈیو لنک دے ذریعے شریک تھئن، جیندے نال کارروائی بغیر کہیں رکاوٹ دے جاری رہی اے۔ عدالت روایتی کاغذی ریکارڈ تے انحصار گھٹ کریندے مکمل ڈیجیٹل کیس فائلز دا استعمال شروع کر ݙتے ۔ ایں قدم نال برانچ رجسٹریز توں ریکارڈ منگواوݨ دی لوڑھ ختم تھی ڳئی اے جیندے نال عدالتی کارروائی اچ تیزی، شفافیت تے کارکردگی اچ نمایاں بہتری آئی اے۔