پہلگام فالس فلیگ آپریشن دا ہک سال گزر چکیے، بھارت اپݨے مؤقف دے حق اچ ثبوت پیش کائنی کرسڳیا، معرکہٴ حق تے آپریشن بنیانِ مرصوص اچ شکست دے بعد بھارت ہݨ کہیں فالس فلیگ آپریشن دی جرات نہ کرسڳسی، عطاء اللہ تارڑ

اسلام آباد۔ 22 اپریل (اے پی پی) وفاقی وزیر اطلاعات و نشریات عطاء اللہ تارڑ آکھیے جو پہلگام فالس فلیگ آپریشن دا ہک سال گزر چکیے پر بھارت اڄ تائیں اپݨے مؤقف دے حق اچ شواہد  پیش کائنی کرسڳیا، فالس فلیگ آپریشنز بھارت دی تاریخ اے، پاکستان پہلگام واقعے دی آزادانہ تحقیقات کراوݨ دی پیشکش کیتی تاں بھارت ایں توں ݙرڳئے۔ عالمی سطح تے پہلگام واقعے متعلق سوال چاتے ڳئن جنھاں دا بھارت کنے کوئی تسلی بخش جواب موجود کائنی ۔ بھارتی میڈیا پہلگام واقعے تے محض پروپیگنڈا تے من گھڑت بیانیے کوں ودھارا ݙتا جیندے نال ایندا مکروہ چہرہ پوری دنیا اچ بے نقاب تھئے۔بھارتی عسکری قیادت دے نویں آپریشن سندور دے بارے اڄوکے بیانات دراصل انھاں دی ناکامی تے شکست دا اعتراف ہن، بھارت کوں اے ڳالھ واضح طور تے سمجھ گھنݨی چاہیدی اے جو کہیں وی قسم دے مس ایڈوینچر دا بھرپور، فوری، موثر تے فیصلہ کن جواب آسی ۔ پاکستان دی سیاسی تے عسکری قیادت ملک دے دفاع کیتے مکمل طور تے ہک اے۔ پوری قوم اپݨی مسلح افواج دے نال کھڑی اے۔ معرکہٴ حق تے آپریشن بنیانِ مرصوص اچ پاکستان بھارت کوں ذلت آمیز شکست نال ݙوچار کیتا ، پاکستان دی فتح کوں پوری دنیا ݙٹھا ، بھارت اڄ وی اپݨے زخم چٹیندا پئے۔ پہلگام واقعہ بھارت دا چھیکڑی فالس فلیگ آپریشن ہئی، بھارت ہݨ کہیں فالس فلیگ آپریشن دی جرات کائناں کر سڳسی۔میڈیا نال ڳالھ کریندے وفاقی وزیراطلاعات آکھیا جو اڄ 22 اپریل کوں پہلگام فالس فلیگ آپریشن دا ہک سال مکمل تھی ڳئے۔ اے واقعہ ہک ایجھی سوچ دی عکاسی کریندے جیڑھی تھوتھے پن ، بے منطقی، کوڑی انا تے حرص تے مبنی اے۔ انھاں آکھیا جو بھارت اپݨے اندرلے معاملیں کوں ٻاہرلے تے ٻاہرلے معاملیں کوں اندرلے رنگ ݙے تے پیش کرݨ دی کوشِش کریندے ۔ دہشت گردی بھارت دا اندرلا معاملہ اے جینکوں او ٻاہرلا مسئلہ بݨا تے پیش کریندے ۔ انھاں مزید آکھیا جو وزیراعظم پاکستان شہباز شریف پہلگام فالس فلیگ آپریشن دی آزادانہ تے غیر جانبدارانہ تحقیقات دی پیشکش کیتی، ساݙی نیت تے عزم ٹھیک ہئی ایں کیتے پاکستان عالمی سطح تے منصفانہ تحقیقات دی پیشکش کیتی تے ایں تحقیقات توں بھارت دا انکار اے ڳالھ ثابت کریندے جو اے ہک فالس فلیگ آپریشن ہئی۔انھاں آکھیا جو پہلگام واقعے متعلق ٻہوں سوال وی چاتے ڳئے جنھاں اچ ساریں توں اہم اے ہے جو واقعے دے محض ݙاہ منٹاں دے اندر ایف آئی آر درج کرڳھدی ڳئی جیڑھا ایں ڳالھ دی نشاندہی کریندے جو ایف آئی آر دا متن پہلے توں تیار ہئی ۔ واقعے دی جاہ تے پولیس اسٹیشن وچال ٻہوں فاصلہ ہئی جئیں پاروں اتنے تھوڑے وقت اچ ایف آئی آر دا اندراج غیر معمولی تے حیران کن اے جیڑھا پورے معاملے دے پہلے توں طے شدہ ہووݨ دا تاثر ݙیندے۔عطاء اللہ تارڑ آکھیا جو بھارتی میڈیا پروپیگنڈا ٹول دے طور تے جیں انداز اچ جنگی ماحول پیدا کیتا تے کوڑیاں خبراں نشر کیتیاں، ایندے نال عالمی سطح تے ایندا مکروہ چہرہ بے نقاب تھئے۔ انھاں آکھیا جو پاکستان ݙے دہشت گردی دے واقعات اچ بھارت دے ملوث ہووݨ دے ناقابلِ تردید ثبوت موجود ہن جنھاں کوں وقتاً فوقتاً بین الاقوامی برادری دے نال شیئر وی کیتا ویندے ۔ جعفر ایکسپریس واقعہ تے خضدار واقعے اچ بھارت دے کردار دے ثبوت موجود ہن۔وفاقی وزیر آکھیا جو بھارت کوں اے ڳالھ واضح طور تے سمجھ گھنݨی چاہیدی اے جو کہیں وی قسم دے مس ایڈوینچر دا بھرپور تے فیصلہ کن جواب ݙتا ویسی ۔ معرکہٴ حق اچ اللہ تعالیٰ دے فضل و کرم نال پاکستان بھارت کوں ذلت آمیز شکست ݙتی اے۔ وزیراعظم شہباز شریف تے فیلڈ مارشل سید عاصم منیر دی انتھک محنت دے نتیجے اچ اڄ پاکستان امن کیتے کوشِشاں کریندا پئے تے پوری دنیا پاکستان کوں عزت تے وقار دی نگاہ نال ݙیکھدی پئی اے۔انھاں ایں عزم دا اعادہ کیتا جو وطن دے دفاع کیتے ہر ممکن قدم چیسوں۔ 22 اپریل کوں بھارت پہلگام فالس فلیگ آپریشن کیتا تے ایں واقعے دی آڑ اچ آپریشن سندور کیتا جیندے تے پاکستان دی فوج منہ بھن جواب ݙتا۔ معرکہٴ حق تے آپریشن بنیانِ مرصوص اچ بھارت کوں شکستِ فاش تھئی، اڳوں اے جرات کائناں کریسن جو ایجھا فالس فلیگ آپریشن کرن ۔ اللہ تعالیٰ معرکہٴ حق اچ پاکستان کوں کامیابی عطا فرمائی اے۔ بھارت اڄ وی اپݨے زخم چٹیندا پئے تے پاکستان ہک روشن ستارہ بݨ تے دنیا اچ ابھرئے۔ پاکستان ہمیشہ زندہ باد۔