وفاقی وزیرِ داخلہ محسن نقوی دی زیرِ صدارت اہم اجلاس، ایئرپورٹس تے سانجھے چیکنگ کاؤنٹرز تے جدید ٹیکنالوجی لاوݨ دا فیصلہ

اسلام آباد۔ 22 اپریل (اے پی پی) وفاقی وزیرِ داخلہ محسن نقوی دی زیرِ صدارت وزارتِ داخلہ تے وزارتِ دفاع دا ہک خصوصی سانجھا اجلاس منعقد تھیا جیند اچ ملک بھر دے ایئرپورٹس تے مسافراں کوں بین الاقوامی معیار دیاں سہولتاں ݙیوݨ تے سکیورٹی نظام کوں جدید بݨاوݨ دے حوالے نال اہم فیصلے کیتے ڳئن۔مسافراں دی سہولت کیتے ایئرپورٹس تے سارے متعلقہ اداریں دے ’’جوائنٹ کاؤنٹرز‘‘ قائم کرݨ دا فیصلہ کیتا ڳئے تاں جو ہک جاہ تے سارے مرحلے مکمل تھی سڳن ۔ ایئرپورٹس تے چیکنگ دے نظام کوں موثر بݨاوݨ کیتے جدید ترین اسکینرز تے مشینری لاتی ویسی۔ وزیرِ داخلہ محسن نقوی سارے اداریں وچال موثر کوآرڈینیشن یقینی بݨاوݨ تے زور ݙیندے آکھیا جو عوام کوں جدید، تکھے تے سوکھیاں سفری سہولتاں ݙیوݨ ساݙا عزم اے۔ ہکے اسکینر تے سارے اداریں دی سانجھی چیکنگ نال مسافراں دے ویلھے دی بچت تھیسی۔