کتاباں صدیاں توں علم و دانائی تے رہنمائی دا لازوال ذریعہ ہن، وزیراعظم محمد شہباز شریف دا کتاب دے جگ ݙیھاڑ تے سنھیا

اسلام آباد۔ 23 اپریل (اے پی پی) وزیراعظم محمد شہباز شریف قومی فکری ارتقاء اچ اساتذہ تے ادباء دے تعمیری کردار تے خدمات دی تعریف کریندے آکھیے جو کتب صدیاں توں علم و دانائی تے رہنمائی دا لازوال ذریعہ ہن تے مطالعے دی عادت شہریاں دی فکری نشوونما، تخلیقی صلاحیت تے باخبر بݨݨ کیتے بنیادی اہمیت دی حامل اے۔ عالمی یومِ کتب تے اپݨے پیغام اچ وزیراعظم آکھیا جو او عالمی یومِ کتب تے پاکستان تے دنیا دے قارئین، مصنفین، ادباء، ناشرین، اساتذہ تے طالب علماں کوں انھاں دی کتاباں نال لڳاؤ تے مطالعے نال رغبت تے دلی مبارخ بالخصوص پاکستان دے ادباء تے اساتذہ دی قومی فکری ارتقاء اچ تعمیری کردار تے انھاں دی بیش قدر خدمات تے خراجِ تحسین پیش کریندن۔وزیراعظم دفتر دے میڈیا ونگ توں جاری بیان موجب وزیراعظم آکھیا جو کتاباں صدیاں توں علم و دانائی تے رہنمائی دا ہک لازوال ذریعہ ہن، کتاباں دی دائمی اہمیت تے مطالعے دی انقلابی قوت دا ادراک یقیناً باشعور ذہن دی عکاسی اے۔ کتاباں نویں سوچ، مختلف نقطہٴ نظر تے ثقافتاں نال متعارف کرویندی اے تے ذہنی افق تے فہم کوں وسعت ݙیندن۔ انھاں آکھیا جو کتاباں باشعور ذہن دی تشکیل، تنقیدی سوچ دے ودھارے دے نال نال ہمدردی، امن تے برداشت جیھے اوصاف دی ترویج دا وی ذریعہ ہن۔ وزیراعظم آکھیا جو اڄ ٹیکنالوجی تے ڈیجیٹل ترقی دے دور اچ ڈیجیٹل ذرائع توں معلومات تئیں رسائی اچ سوکھ (آسانی) نال کتب تے مطالعے دی اہمیت ٻیا وی اجاگر تھی ڳئی اے۔ مطالعے دی عادت فکری نشوونما تے باخبر شہری بݨݨ کیتے بنیادی حیثیت رکھیندی اے۔وزیراعظم آکھیا جو نوجوان نسل اچ مطالعے دے رجحان کوں ودھارا ݙیوݨ تے معیاری کتب تئیں رسائی کوں یقینی بݨاوݨ نہایت ضروری اے تاں جو انھاں دی بطور باشعور تے ذمہ دار شہری تربیت کیتی ونڃ سڳے۔ انھاں نوجواناں، اساتذہ، والدین تے تعلیمی اداریں توں خصوصی اپیل کیتی جو او اجتماعی سطح تے معاشرے اچ مطالعے دی عادت کوں ودھارا ݙیوݨ اچ اپݨا کردار ادا کرن