کتاب علم،شعور تے تہذیبی ورثے دی امین اے، وزیرِمملکت وفاقی تعلیم وجیہہ قمر

اسلام آباد۔ 23 اپریل (اے پی پی) وزیرِمملکت وفاقی تعلیم و پیشہ ورانہ تربیت وجیہہ قمر عالمی یومِ کتب دے موقع تے اپݨے پیغام اچ آکھیے جو کتاباں علم، شعور تے تہذیبی ورثے دی امین اے تے کہیں وی قوم دی فکری ترقی اچ بنیادی کردار ادا کریندی اے ۔ انھاں آکھیا جو پاکستان دے ادباء، مصنفین تے اساتذہ معاشرے اچ علم و آگہی دے ودھارے کیتے ٻہوں وݙی خدمات سرانجام ݙتن، جیڑھی جو تعریف دے لائق اے ۔انھاں آکھیا جو موجودہ ڈیجیٹل دور اچ جتھاں معلومات تائیں رسائی پہلے توں کتھائیں ودھ سوکھی تھی چکی اے، اتھائیں معیاری مطالعے دی اہمیت ٻئی وی ودھ ڳئی اے۔ کتاب انسان اچ تنقیدی سوچ تے تخلیقی تے بہتر فیصلہ سازی دی صلاحیتاں کوں ودھارا ݙیندی اے، جیڑھا جو ہک باشعور تے ذمہ دار معاشرے دی تشکیل سانڳے ناگزیر اے۔وزیرِ مملکت ایں ڳالھ تے زور ݙتا جو نوجوان نسل اچ مطالعے دے رجحان کوں ودھارا ݙیوݨ ویلھے دی لوڑھ اے۔ ایں مقصد کیتے معیاری کتب تئیں رسائی، لائبریریاں دے ودھارے تے تعلیمی وسائل ݙیوݨ یقینی بݨایا ویندا پئے تاں جو طالب علماں کوں ہک مثبت تے علم دوست ماحول مل سڳے۔ انھاں مزید آکھیا جو حکومت خواندگی دے ودھارے، علم تائیں سوکھی رسائی تے کتاب دوستی دے کلچر کوں تکڑا بݨاوݨ کیتے عملی اقدامات جاری رکھی ہوئی اے۔ انھاں قوم بالخصوص نوجواناں تے زور ݙتا جو او مطالعے کوں اپݨی زندگی دا حصہ بݨاون تے پاکستان کوں ہک علم تے مبنی، ترقی یافتہ تے روشن خیال معاشرہ بݨاوݨ اچ اپݨا کردار ادا کرن۔