ملک اچ پٹرول دا وافر ذخیرہ موجود، مقامی پیداوار اچ ودھارا تھیندا پئے،وزیراعظم دی صدارت اجلاس کوں بریفنگ، انرجی سکیورٹی یقینی بݨاوݨ کیتے اقدامات ناگزیرہن، شہباز شریف

اسلام آباد۔ 23 اپریل (اے پی پی) وزیراعظم محمد شہباز شریف انرجی سکیورٹی یقینی بݨاوݨ کیتے اقدامات کوں ناگزیر قرار ݙیندے آندے سرکاری استعمال کیتے صرف بجلی نال چلݨ آلی بساں تے موٹر سائیکلاں مل گھنݨ، شمسی توانائی توں پیدا تھئی ودھ بجلی دی اسٹوریج کیتے بیٹریاں دا حصول سوکھا بݨاوݨ کیتے لائحہ عمل بݨاوݨ تے مقامی طور تے اعلیٰ معیار دی اسٹوریج بیٹریاں تیار کرݨ دی حوصلہ افزائی کرݨ دی ہدایت کیتی۔وزیراعظم دی زیرِصدارت انرجی سکیورٹی دے حوالے نال اہم اجلاس تھیا جیند اچ وفاقی وزراء مصدق مسعود ملک، احد خان چیمہ، محمد اورنگزیب، سردار اویس لغاری، عطاء اللہ تارڑ، علی پرویز ملک، احسن اقبال، مشیرنجکاری محمد علی، وزیرِ مملکت بلال اظہر کیانی، معاونِ خصوصی ہارون اختر تے ٻئے اعلیٰ حکام شرکت کیتی اے۔ وزیراعظم دفتردے میڈیا ونگ دی توں جاری بیان موجب وزیراعظم آکھیا جو انرجی سکیورٹی ہݨ ملک دی مستقبل دی مجموعی منصوبہ بندی دا ٻہوں اہم حصہ بݨ چکی اے۔ انھاں آکھیا جو مستقبل اچ سرکاری استعمال کیتے صرف بجلی نال چلݨ آلی بساں تے موٹرسائیکلاں مل ڳھدیاں ونڄن، الیکٹرک وہیکلز کیتے چارجنگ اسٹیشنز دے قیام کیتے مزید تکھے اقدامات کیتے ونڄن۔اجلاس کوں بریفنگ اچ ݙسایا ڳیا جو ملک اچ ایں ویلھے پٹرولیم دا وافر ذخیرہ موجود اے، ملک اچ غذائی سکیورٹی دی صورتحال مستحکم اے، تیل تے گیس کمپنیاں دی مسلسل کوشِشاں نال گیس تے تیل دی مقامی پیداوار اچ ودھارا تھیندا پئے۔