پاکستان کوں چین دے نال اسٹریٹجک شراکت داری تے ماݨ اے، وزیراعظم محمد شہباز شریف دی چین دے سفیر جیانگ زائیڈونگ نال ڳالھ مہاڑ

اسلام آباد۔ 23 اپریل (اے پی پی) وزیراعظم محمد شہباز شریف چین دے نال پاکستان دی تزویراتی (اسٹریٹجک) شراکت داری کوں تکڑا بݨاوݨ دی خواہش دا اعادہ کریندے آکھیے جو پاکستان ایں شراکت داری تے ماݨ کریندی اے ۔ انھاں اے ڳالھ انھاں عوامی جمہوریہ چین دے سفیر جیانگ زائیڈونگ کوں آکھی جنہاں اتھاں وزیراعظم محمد شہباز شریف نال ملاقات کیتی اے۔وزیراعظم دفتر دے میڈیا ونگ توں جاری بیان موجب ملاقات اچ نائب وزیراعظم تے وزیرِ خارجہ اسحاق ڈار، وفاقی وزیر ڈاکٹر احسن اقبال، وفاقی وزیر اطلاعات عطاء اللہ تارڑ، وزیراعظم دے معاونِ خصوصی سید طارق فاطمی تے سیکریٹری خارجہ آمنہ بلوچ وی موجود ہن۔ وزیراعظم عوامی جمہوریہ چین دے صدر شی جن پنگ تے وزیراعظم لی چیانگ کیتے اپݨی نیک تمناواں دا اظہار کیتے۔ پاکستان تے چین دے ݙو طرفہ تعلقات تے اطمینان دا اظہار کریندے وزیراعظم ایں ڳالھ دا اعادہ کیتا جو پاکستان کوں چین دے نال اسٹریٹجک شراکت داری تے ماݨ اے۔ ملاقات دے دوران مشرقِ وسطیٰ دی صورتحال تے پاکستان دی امن کوشِشاں تے وی ڳالھ مہاڑ کیتی ڳئی ۔ چینی سفیر وزیراعظم دا شکریہ ادا کیتا تے خطے اچ دیرتئیں امن کیتے پاکستان دی سفارتی کوشِشاں دی تعریف کیتی۔