وزیراعظم محمد شہبازشریف دی صدارت اچ ساوݨ دی پیشگی تیاری تے موسمیاتی تبدیلی و ماحولیاتی خطرے توں بچݨ دے اقدامات تے جائزہ اجلاس

اسلام آباد۔ 23 اپریل (اے پی پی) وزیراعظم محمد شہباز شریف گلگت بلتستان اچ لڳے پیشگی موسمیاتی وارننگ سسٹم دے مکمل طور تے فعال نہ ہووݨ تے کاوڑ کریندے انکوائری دا حکم ݙے ݙتے۔ وزیراعظم محمد شہباز شریف دی زیرِ صدارت ساوݨ دی پیشگی تیاری تے موسمیاتی تبدیلی و ماحولیاتی خطرے توں بچݨ دے اقدامات تے جائزہ اجلاس تھیا۔وزیراعظم دفتر دے میڈیا ونگ توں جاری بیان موجب اجلاس اچ وفاقی وزیر پلاننگ اینڈ ڈویلپمنٹ احسن اقبال، وفاقی وزیر قانون اعظم نذیر تارڑ، وفاقی وزیر اقتصادی امور احد خان چیمہ، وفاقی وزیر موسمیاتی تبدیلی مصدق ملک، وفاقی وزیر خزانہ محمد اورنگزیب، مشیر وزیراعظم رانا ثناء اللہ، وزیرِ مملکت خزانہ اظہر بلال کیانی، چیئرمین این ڈی ایم اے، چیئرمین واپڈا تے سارے صوبیں دے چیف سیکرٹریز تے متعلقہ سرکاری عہدیداراں شرکت کیتی اے۔وزیراعظم غیر معمولی موسمیاتی تبدیلی بالخصوص گلوف (گلیشیئر دا پگھلݨ) توں بچݨ کیتے گلگت بلتستان اچ لڳے پیشگی وارننگ سسٹم دے مکمل طور تے فعال نہ ہووݨ تے کاوڑ کریندے آکھیے پچھلے سال واضح ہدایات دے باوجود سسٹم دی غیر فعالیت تے متعلقہ اداریں دی غیر موثر کارکردگی تے انکوائری دا حکم ݙے ݙتے۔ انھاں آکھیا جو متعلقہ اداریں دی نااہلی تے کارکردگی اچ کمی کہیں صورت برداشت کائناں کیتی ویسی۔ عوام دی سہولت، خدمت تے خطرے توں بچݨ کیتے اقدامات سارے اداریں دا فرض اے جیندے بارے اچ پچھیا ویسے۔وزیراعظم آکھیا جو پاکستان موسمیاتی تبدیلی دے نقصان دہ اثرات توں متاثرہ ملکاں اچ سرِ فہرست اے جیندے کیتے ہنگامی بنیاداں تے کم کرݨ دی لوڑھ اے۔ انھاں ہدایت کیتی جو سارے وفاقی متعلقہ ادارے صوبیں دے نال مکمل تعاون تے ہم آہنگی نال پالیسی دے نفاذ اچ سامݨے آوݨ آلی ساری رکاوٹاں کوں وقتی ہٹاون۔ انھاں آکھیا جو پچھلے سال ساوݨ سیزن اچ دریاواں دی گزرگاہواں تے چھل دے ممکنہ رستیں اچ ناجائز قبضے (تجاوزات) تباہی دا باعث بݨن۔ ایں سال ایندے حل کیتے پیشگی موثر حکمتِ عملی اختیار کیتی ڳئی اے۔انھاں ہدایت کیتی جو ساوݨ دے دوران ممکنہ چھل توں بچݨ سانڳے سارے ادارے اپݨی صلاحیت ودھیندے عوام دی سہولت کیتے وسائل توں ودھ تے کم کرن ۔ پیشگی وارننگ سسٹم دی ڈیجیٹل مانیٹرنگ کیتے سارے ضروری انفراسٹرکچر ݙیوݨ تے فعالیت یقینی بݨاوݨ ناگزیر اے۔ انھاں آکھیا جو وفاقی وزارتِ موسمیاتی تبدیلی تے پلاننگ اینڈ ڈویلپمنٹ تے ٻئے سارے متعلقہ ادارے صوبیں دے سانجھے تعاون نال کٹھے تھی تے موثر اقدامات کرن۔