صدرِ مملکت دا ضلع خیبراچ فتنہ الخوارج دے 22 دہشت گرداں دی ہلاکت تے سکیورٹی فورسز کوں خراجِ تحسین

اسلام آباد۔ 24 اپریل (اے پی پی) صدرِ مملکت آصف علی زرداری ضلع خیبر اچ مشترکہ انٹیلی جنس آپریشن اچ فتنہ الخوارج دے 22 دہشت گرداں دی ہلاکت تے اسلحے دی برآمدگی تے سکیورٹی فورسز کوں خراجِ تحسین پیش کریندے آکھیے جو دہشت گردی دے ناسور دے خلاف سکیورٹی فورسز تے قانون نافذ کرݨ الے اداریں دیاں قربانیاں ماݨ دے لائق ہن۔ایوانِ صدر دے پریس ونگ توں جاری بیان موجب صدر مملکت دہشت گرداں دی فائرنگ نال 10 سالہ نشوم ٻال دی شہادت تے ٻہوں ݙکھ تے افسوس کیتے تے اہل خانہ نال تعزیت کیتی اے۔ انھاں آکھیا جو ایجھے ویلھے اچ جݙاں پاکستان دی قیادت خطے تے دنیا اچ امن کیتے ٻہوں کوشِشاں کریندی پئی اے، دہشت گرد ساݙی ایں کوشِش کوں کمزور کرݨ چاہندن۔ صدر آصف علی زرداری آکھیا جو اساں دہشت گردی کوں وی شکست ݙیسوں تے خطے اچ امن کیتے اپݨا قائدانہ کردار وی ادا کریندے رہسوں