سپارکو ولوں مقامی طور تے تیار کیتی ڳئی الیکٹرو آپٹیکل سیٹلائٹ (ای او-3) دی کامیاب لانچنگ دا اعلان

راولپنڈی۔ 25 اپریل (اے پی پی) پاکستان اسپیس اینڈ اپر ایٹموسفیئر ریسرچ کمیشن (سپارکو) چین دے تائی یوان سیٹلائٹ لانچ سینٹر توں مقامی طور تے تیار کیتی ڳئی الیکٹرو آپٹیکل سیٹلائٹ (ای او-3) دی کامیاب لانچنگ دا اعلان کیتے ۔ پاک فوج دے شعبہ تعلقاتِ عامہ (آئی ایس پی آر) دے مطابق ای او-3 سیٹلائٹ دا کامیاب اجراء پاکستان دی خود انحصاری تے تکنیکی ترقی آلے پاسے ہک اہم سنگ میل اے۔اے سیٹلائٹ شہری منصوبہ بندی، قدرتی آفتاں نال نبٹݨ، غذائی تحفظ تے ماحولیاتی تحفظ دے شعبیں اچ جدید امیجنگ ڈیٹا ݙیسی۔ آئی ایس پی آر دے مطابق ای او-3 سیٹلائٹ دی کامیاب لانچنگ ہک مربوط ارتھ آبزرویشن سسٹم دی بنیاد ثابت تھیسی جیڑھی جو مختلف شعبیں اچ پالیسی سازی تے ترقیاتی منصوبیں اچ مدد ݙیسی تے پائیدار سماجی و اقتصادی ترقی اچ کردار ادا کریسی۔ وزیراعظم محمد شہباز شریف ایں تاریخی کامیابی تے سپارکو دے انجینئرز تے سائنسداناں دی پیشہ ورانہ مہارت تے عزم دی تعریف کیتی جݙاں جو خلائی شعبے اچ چین دے مسلسل تعاون کوں وی ٻہوں اہم قرار ݙتے