صدرمملکت آصف علی زرداری دا چین اچ ‘ہونان ٹی گروپ’ دا دورہ، چاہ دی صنعت اچ تعاون دی دعوت

اسلام آباد، 26 اپریل (اے پی پی) صدرِ مملکت آصف علی زرداری چین دے شہر چانگشا اچ ‘ہونان ٹی گروپ کمپنی لمیٹڈ’ دا دورہ کیتے۔ ایں موقع تے ہونان ٹی گروپ دے چیئرمین زو ژونگ وانگ صدر کوں گروپ دے آپریشنز، سپلائی چین تے بین الاقوامی مارکیٹ اچ موجودگی بارے اچ بریفنگ ݙتی اے۔صدرِ مملکت کوں گروپ دے ‘اینڈ ٹو اینڈ’ ماڈل دا ݙسایا ڳئے ۔جیڑھا جو کاشتکاری، پروسیسنگ، تحقیق، مارکیٹنگ تے چاہ دی ثقافت کوں ہک ہی صنعتی فریم ورک دے تحت کٹھا کریندے۔ایوانِ صدر دے پریس ونگ توں جاری پریس ریلیز موجب، بریفنگ اچ ݙسایا ڳئے جو کیویں ماحولیاتی چاہ دے باغات، مخصوص پیداواری سہولتاں تے تقسیم دے نظام کوں مقامی فروخت تے برآمدات ݙوہیں کیتے منظم کیتا ڳئے۔صدر کوں ݙسایا ڳئے جو ہونان ٹی گروپ صوبے دی چاہ دی صنعت کیتے ہک مربوط پلیٹ فارم دے طور تے کم کریندے ۔ جیڑھا جو کاشتکاراں، صنعت تے تحقیقی اداریں کوں برانڈنگ تے مارکیٹ تئیں رسائی دے نال جوڑیندے۔دورے دے دوران صدر دے رلے سینیٹر سلیم مانڈوی والا، سندھ دے سینئر صوبائی وزیر شرجیل انعام میمن، علی حسن بروہی، سرمایہ کاری تے پبلک پرائیویٹ پارٹنرشپ پراجیکٹس کیتے وزیراعلیٰ سندھ دے معاونِ خصوصی سید قاسم نوید قمر، چیف سیکرٹری سندھ، پاکستان اچ چین دے سفیر جیانگ زیڈونگ تے چین اچ پاکستان دے سفیر خلیل ہاشمی وی موجود ہن۔دورے دے دوران صدرمملکت کمپنی دی ہسٹری گیلری دا معائنہ کیتا اتے چاہ دی پروسیسنگ تے ثقافت تے پریزنٹیشن ݙٹھی۔ انھاں چاہ چکھݨ دی ہک نشست اچ وی شرکت کیتی اے۔صدر زرداری ویلیو ایڈیشن ، زرعی پروسیسنگ تے برآمدات دی ترقی اچ تعاون دی گنجائش دا ذکر کیتا تے گروپ کوں انھاں شعبیں اچ پاکستان دے نال اشتراک دے موقع لبھݨ دی دعوت ݙتی اے۔