صدرِ مملکت آصف علی زرداری پروفیسر پان شیانگ بن کوں پاکستان aچ امراضِ قلب کیتے انہاں دی خدمات تے ستارۂ پاکستان نال نوازیا

چانگشا۔27 اپریل (اے پی پی) صدرِ مملکت آصف علی زرداری پروفیسر پان شیانگ بن کوں پاکستان اچ امراضِ قلب کیتے انہاں دی خدمات تے ستارۂ پاکستان عطا کیتا۔ سنوار کوں ایوانِ صدر دے پریس ونگ توں جاری بیان دے مطابق صدرِ مملکت آصف علی زرداری سنوار کوں  تھیوݨ آلی ہک خصوصی تقریب اچ پروفیسر پان شیانگ بن کوں دل دے روڳاں دے علاج تے پاکستان اچ مریضاں دی خدمت دے شعبے اچ نمایاں خدمات دے اعتراف اچ ستارۂ پاکستان عطا کیتا۔ پروفیسر پان شیانگ بن ہک بین الاقوامی شہرت یافتہ کارڈیالوجسٹ تے کارڈیک سرجن ہن۔ او فیووئی ہسپتال دے نائب صدر تے چائینز اکیڈمی آف میڈیکل سائنسز نال جڑے ہوئن، جڈانجو سٹرکچرل ہارٹ ڈیزیز دے قومی تے بین الاقوامی کوالٹی کنٹرول سینٹر دے ڈائریکٹر وی ہن۔ او عالمی شہرت یافتہ ماہر ہن تے جدید تشخیصی تے علاجی ٹیکنالوجی دی ترقی اچ نمایاں کردار ادا کر چکن۔ انہاں دے ناں کئی عالمی سطح دی ایجاداں ہن جنہاں اچ الٹراساؤنڈ دی رہنمائی اچ ایجھے طریقے شامل ہن جنہاں دے ذریعے بغیر سرجری، بغیر تابکاری اثرات تے بغیر جنرل اینستھیزیا علاج ممکن ٻݨایا ڳیا۔ پروفیسر پان شیانگ بن جنوری 2025 اچ پاکستان دا دورہ کیتا جتھاں انہاں آپݨی ٹیم دے نال پیدائشی دل دے روڳاں اچ مبتلا بالاں دے جان بچاوݨ آلے کامیاب علاج کیتے جڈانجو پاکستانی طبی ماہرین کوں جدید انٹرنیشنل تکنیکاں دی خصوصی تربیت وی فراہم کیتی۔ صدرِ مملکت آصف علی زرداری، جیڑھے چین دے پنج ڈینہوار دورے تے ہن، آکھیا جو انھاں خدمات نال پاکستان دے شعبہ صحت دی استعداد اچ اضافہ تھیے اتے اے پاکستان چین تعاون دے عملی ثمرات دی عکاسی کریندی اے۔ ایں پروقار تقریب اچ سینیٹر سلیم مانڈوی والا، شرجیل انعام میمن تے چین وچ پاکستان دے سفیر خلیل ہاشمی سمیت بئے حکام وی موجود ہن۔