اقتصادی ترقی کیتے سرمایہ کاری دا فروغ حکومت دی پہلی ترجیح اے، ایس آئی ایف سی دے قیام نال ملک اچ سرمایہ کاراں دے اعتماد اچ اضافہ تھیے، وزیراعظم شہباز شریف

اسلام آباد۔28 اپریل (اے پی پی) وزیراعظم محمد شہباز شریف آکھیا جو اقتصادی ترقی کیتے سرمایہ کاری دا فروغ حکومت دی پہلی ترجیح اے، خصوصی سرمایہ کاری سہولت کونسل (SIFC) دے قیام نال ملک اچ سرمایہ کاراں دے اعتماد اچ اضافہ تھیے، حکومت تے سرمایہ کاراں دے درمیان رابطیاں کوں تگڑا کیتا ونجے، لائسنسنگ تے ٻئی سروسز تک رسائی دے سارے نظام دی ڈیجیٹائزیشن دی رفتار تیز کیتی ونڄے۔ منگل کوں وزیراعظم آفس دے میڈیا ونگ توں جاری بیان دے مطابق وزیراعظم محمد شہباز شریف دی صدارت اچ ملک اچ سرمایہ کاری دے فروغ تے جائزہ اجلاس تھیا۔ اجلاس اچ وفاقی وزیر قانون و انصاف اعظم نذیر تارڑ، وفاقی وزیر اقتصادی امور احد خان چیمہ، وفاقی وزیر انفارمیشن ٹیکنالوجی تے ٹیلی کام شزا فاطمہ، وزیر مملکت برائے خزانہ تے ریلوے بلال اظہر کیانی، وزیراعظم دے معاون خصوصی ہارون اختر اتے متعلقہ اعلیٰ سرکاری افسراں شرکت کیتی۔ وزیراعظم ہدایت کیتی جو برآمدات ودھاوݨ کیتے ملکی تے غیر ملکی سرمایہ کاراں کوں ساری ضروری سہولتاں دی فراہمی یقینی ٻݨائی ونڄے، سرمایہ کاری دے فروغ کیتے ریگولیٹری تعمیل تے عملدرآمد کوں بئیا سوکھا تے ڳھٹ خرچ ٻݨایا ونڄے۔ وزیراعظم آکھیا جو ایس آئی ایف سی دے قیام نال سرمایہ کاراں دا اعتماد ودھیے۔ اجلاس کوں ݙسایا ڳیا جو ایں مالی سال جولائی توں مارچ تئیں ملکی برآمدات اچ خصوصی اقتصادی زونز دا حصہ 3.7 فیصد ریہا، جینکوں 2028 تئیں 8 فیصد تئیں گھن ونجݨ دا ہدف اے۔ صوبیاں دی مشاورت نال “بزنس ریڈی ایکشن پلان” تیار کیتا ویندا پئے اتے سرمایہ کاراں کیتے ساری سروسز ڈیجیٹائز کیتی ویندی پئن۔ ملک اچ ایں ویلھے 21 خصوصی اقتصادی زونز آپریشنل ہن اتے جون 2026 تئیں اے تعداد 26 تھی ویسی۔