صدر آصف علی زرداری دی چینی سرمایہ کاراں کوں پاکستان اچ ترجیحی شعبیاں اچ سرمایہ کاری ودھاوݨ دی دعوت

سانیا۔29 اپریل (اے پی پی) صدرِ مملکت آصف علی زرداری چین دے دورے دے دوران ہانگژو جن جیانگ گروپ دے سی ای او وانگ جیان نال بدھ کوں ملاقات کیتی اتے کمپنی کوں پاکستان اچ متبادل توانائی، پاݨی دی صفائی تے الیکٹرک گاݙیاں دی بیٹری سسٹمز سمیت ترجیحی شعبیاں اچ چینی سرمایہ کاری ودھاوݨ دی دعوت ݙتی۔ ایوانِ صدر دے پریس ونگ توں جاری بیان دے مطابق ملاقات دے دوران صدرِ مملکت کوں ݙسایا ڳیا جو اے گروپ پہلے وی پاکستان اچ کئی منصوبیاں تے کم کریندا پئے اتے چین دے سرفہرست 100 کاروباری گروپاں اچ شامل اے۔ ایندی سرگرمیاں بھاری صنعت، کھاد، تیل و گیس، کوئلہ گیسی فکیشن، قابلِ تجدید توانائی، زراعت تے آبپاشی جیہے شعبیاں تک کھنڈی ہوئن۔ صدرِ مملکت آکھیا جو پاکستان مختلف شعبیاں خاص طور تے واٹر ٹریٹمنٹ، الیکٹرک وہیکل بیٹری سسٹمز تے متبادل توانائی دے شعبیاں اچ غیر ملکی سرمایہ کاری دی بھرپور حوصلہ افزائی کریندا پئے۔ انہاں آکھیا جو ایں قسم دی شراکت داری پائیدار ترقی تے صنعتی پیش رفت اچ مددگار تھی سڳدی اے۔ صدر آصف علی زرداری آکھیا جو حکومتِ سندھ صوبے اچ سرمایہ کاری کرݨ آلی غیر ملکی کمپنیاں کوں خاص طور تے پبلک پرائیویٹ پارٹنرشپ دے تحت ہر ممکن سہولت فراہم کریسی۔ ملاقات اچ سینیٹر سلیم مانڈوی والا، سندھ دے سینئر وزیر شرجیل انعام میمن، وزیراعلیٰ سندھ دے معاونِ خصوصی سید قاسم نوید قمر تے چیف سیکرٹری سندھ وی شریک ہن۔