وفاقی کابینہ ولوں ملک اچ ویکسین بݨاوݨ دی پالیسی، ملک دی پہلی نیشنل ایگریکلچر بائیو ٹیکنالوجی پالیسی، نیشنل سیڈ پالیسی تے نیشنل سکلز ڈویلپمنٹ پالیسی دی منظوری

اسلام آباد۔ 29 اپریل (اے پی پی) وفاقی کابینہ ملک اچ ویکسین بݨاوݨ دی پالیسی، ملک دی پہلی نیشنل ایگریکلچر بائیو ٹیکنالوجی پالیسی، نیشنل سیڈ پالیسی تے نیشنل سکلز ڈویلپمنٹ پالیسی دی منظوری ݙے ݙتی اے، جݙاں جو وزیراعظم محمد شہباز شریف وفاقی کابینہ کوں مشرقِ وسطیٰ اچ جاری کشیدگی گھٹ کرݨ کیتے پاکستان دی سفارتی کوششان تے اعتماد اچ گھدا‏۔ وزیراعظم آفس دے میڈیا ونگ ولوں جاری بیان دے مطابق وزیراعظم محمد شہباز شریف دی صدارت وفاقی کابینہ دا اجلاس بدھ کوں تھیا جئیں اچ وزیراعظم کابینہ ممبران کوں پاکستان ولوں مشرقِ وسطیٰ اچ جاری کشیدگی کوں گھٹ کرݨ کیتے سفارتی کوششاں دا ݙسیا۔ وزیراعظم عالمی سطح تے پٹرولیم مصنوعات دی قیمتاں دے بحران دے باوجود عوامی سہولت کیتے صورتحال کوں ہر ممکن بہتر انداز اچ سنبھالݨ تے اطمینان دا اظہار کیتا‏۔ بیان دے مطابق وفاقی کابینہ دے اجلاس اچ ایجنڈا تے موجود مختلف شعبہ جاتی پالیسیاں دی وی منظوری ݙتی ڳئی‏۔ وفاقی کابینہ ملکی سطح تے ویکسین بݨاوݨ دی پالیسی دی منظوری ݙتی‏۔ ایں تناظر اچ ڈریپ (DRAP) دے زیرِ نگرانی قیمتاں دے تعین تے معیار کوں یقینی بݨاوݨ کیتے خصوصی کمیٹی بݨاوݨ دی وی منظوری ݙتی ڳئی‏۔ پالیسی دا مقصد ویکسین دی مد اچ درآمدات تے انحصار گھٹ کرݨ، قیمتی زرمبادلہ دی بچت تے ملک کوں ویکسین دی تیاری اچ خود کفیل کرݨ اے‏۔ وفاقی کابینہ وفاقی نظامتِ تعلیم اچ یومیہ اجرت (ڈیلی ویجز) تے خدمات انجام ݙیوݨ آلے گریڈ 1 توں 15 دے اساتذہ دے حوالے نال سپریم کورٹ دے فیصلے دی روشنی وچ انھاں دی اہلیت دے مطابق وفاقی نظامتِ تعلیمات وزٹنگ فیکلٹی ریگولیشنز 2025 دے تحت انھاں دی خدمات بطور وزٹنگ فیکلٹی گھدے ونڄݨ دی منظوری ݙتی‏۔ وفاقی کابینہ دے اجلاس اچ نیشنل سکلز ڈویلپمنٹ پالیسی دی وی منظوری ݙتی گئی‏۔ پالیسی دے تحت ملکی صنعت تے تجارت دی ضرورتاں تے جدید دور دے تقاضیاں دے مطابق افرادی قوت دی استعدادِ کار کوں ہم آہنگ کرݨ کیتے عملی اقدامات کیتے ویسن‏۔ ایندے توں علاوہ ٻاہرلے ملک ونڄݨ آلے پاکستانیاں کیتے بین الاقوامی معیار دی تربیت تے سرٹیفیکیشن کیتے خصوصی اقدامات وی پالیسی دا حصہ ہن‏۔ وفاق تے سارے صوبے ایں تناظر اچ آپسی تعاون نال کم کریسن، نجی شعبہ وی ایں پالیسی تے عملدرآمد دا اہم حصہ تھیسی‏۔ کابینہ ملک دی پہلی نیشنل ایگریکلچر بائیو ٹیکنالوجی پالیسی دی وی منظوری ݙتی جئیں دا مقصد قومی غذائی تحفظ، زرعی پیداوار اچ خاطر خواہ اضافہ تے زرعی شعبے اچ تحقیق و ترقی تے موثر حکمتِ عملی کوں یقینی بݨاوݨ اے‏۔ اجلاس اچ نیشنل سیڈ پالیسی 2025 دی وی اصولی منظوری ݙتی ڳئی‏۔ پالیسی دا مقصد غذائی تحفظ تے کساناں کوں بااختیار بݨاوݨ اے‏۔ پالیسی دے تحت 15 توں 20 فیصد زرعی پیداوار اچ اضافہ تے عالمی معیار دی سیڈ کمپنیز نال شراکت داری کیتے اقدامات چاتے ویسن‏۔ ایندے توں علاوہ وفاقی کابینہ دے اجلاس اچ نیپرا دی سالانہ رپورٹ 2025 تے سٹیٹ آف انڈسٹری رپورٹ 2025 وی پیش کیتی ڳئی‏۔ اجلاس اچ وفاقی وزیر برائے تخفیفِ غربت و سماجی تحفظ عمران احمد شاہ دی والدہ دے انتقال تے فاتحہ خوانی وی کیتی ڳئی‏۔