پاکستان صحت تے فارماسیوٹیکل شعبے اچ اہم سنگِ میل عبور کر گھدے، سید مصطفیٰ کمال

اسلام آباد۔ 30 اپریل (اے پی پی) وفاقی وزیر برائے قومی صحت سید مصطفیٰ کمال آکھیا جو پاکستان صحت تے فارماسیوٹیکل شعبے اچ ہک اہم سنگِ میل عبور کر ڳھدے‏۔ ڈرگ ریگولیٹری اتھارٹی آف پاکستان (DRAP) دی سینٹرل ڈرگز لیبارٹری کوں عالمی ادارہ صحت (WHO) دی پری کوالیفیکیشن حاصل تھیوݨ نال ملکی ادویات دے معیار تے عالمی ساکھ اچ نمایاں اضافہ تھیسی‏۔ خمیس کوں پریس کانفرنس کریندیں ہوئیں انہاں آکھیا جو ایں سرٹیفیکیشن دے حصول نال پاکستان دی فارماسیوٹیکل مصنوعات دی برآمدات کوں نواں بوسٹ ملسی‏۔ ہݨ ٻاہرلے ملک پاکستانی ادویات دی ریگولیٹری سکروٹنی اچ نمایاں کمی آسی، جئیں دے نتیجے اچ ایکسپورٹرز کوں گھٹ دستاویزی تقاضیاں تے سوکھے تجارتی عمل دا سامݨا تھیسی‏۔ انہاں آکھیا جو اے پیشرفت پاکستان کوں عالمی ادارہ صحت دے لیول تھری ریگولیٹری سٹیٹس دے حصول دے نیڑے گھن آئی اے‏۔ ایں ویلھے پاکستان ڈبلیو ایچ او لیول ٹو تے اے، تاہم آندے 6 توں 8 مہینیاں اچ لیول تھری حاصل کرݨ دی توقع اے‏۔ لیول تھری سٹیٹس ملݨ دے بعد پاکستان دی ادویات دی برآمدات اچ اضافہ متوقع اے‏۔ موجودہ وقت اچ پاکستان تقریباً 51 ملکاں کوں دوائیں برآمد کریندا پئے، تاہم لیول تھری سرٹیفیکیشن دے بعد اے تعداد ودھ کراہیں 150 ملکاں تئیں پڄ ویسی‏۔ ایں وقت تقریباً 100 ملکاں اچ پاکستانی ادویات دی رسائی صرف ریگولیٹری تقاضے پورے نہ تھیوݨ دی وجہ توں ممکن کائنی‏۔ انہاں آکھیا جو پاکستان دے کول ادویات دے معیار، مہارت تے پیداواری صلاحیت اچ کہیں قسم دی کمی کائنی، تاہم بین الاقوامی سرٹیفیکیشن دی عدم موجودگی ہک ٻہوں وݙی رکاوٹ ہئی، جیڑی ہݨ تیزی نال دور تھیندی پئی اے‏۔ ݙوجھے پاسے وفاقی کابینہ پاکستان دی تاریخ اچ پہلی واری مقامی ویکسین دی تیاری کیتے قومی ویکسین پالیسی دی منظوری ݙے ݙتی اے‏۔ ایں پالیسی نال نہ صرف مقامی سطح تے ویکسین دی پیداوار کوں فروغ ملسی بلکہ غیر ملکی سرمایہ کاری دے نویں موقع وی پیدا تھیسن‏۔ انہاں آکھیا جو کہیں وی ملک اچ ویکسین دی تیاری کیتے واضح پالیسی دا ہووݨ انتہائی ضروری ہوندے اتے پاکستان اچ ایں خلا کوں ہݨ باقاعدہ طور تے پُر کر ݙتا گئے‏۔ اے ڈوہائیں اقدامات پاکستان دے صحت دے نظام تے فارماسیوٹیکل صنعت کیتے گیم چینجر ثابت تھیسن جیڑھے ملک کوں عالمی منڈی اچ ہک مضبوط مقام ݙیواوݨ اچ مدد کریسن‏۔