پاکستان تے چین ’’ہر موسم دے سٹریٹجک شراکت دار‘‘ ہن، چین نال دوستی پاکستان دی خارجہ پالیسی دا سنگِ بنیاد اے، صدرِ مملکت آصف علی زرداری

سانیا ۔ 30 اپریل (اے پی پی) صدرِ مملکت آصف علی زرداری آکھیا جو پاکستان تے چین ’’ہر موسم دے سٹریٹجک شراکت دار‘‘ ہن تے چین نال دوستی پاکستان دی خارجہ پالیسی دا سنگِ بنیاد اے جینکوں عوامی تے ادارہ جاتی سطح تے وسیع حمایت حاصل اے‏۔ رواں سال ڈوہیں ملکاں دے درمیان سفارتی تعلقات دے قیام دی 75 ویں سالگرہ منائی ویندی پئی اے تے ایں حوالے نال جاری تقریبات ݙوپاسہ تعلقات کوں مزید مستحکم کرݨ تے تعاون دے نویں مواقع پیدا کرݨ اچ مددگار تھیسن‏۔ چین دے صوبے ہائنان دی سیاحت، ہائی ٹیک صنعت تے استوائی زراعت اچ ترقی کوں باہمی تعاون دے عملی مواقع قرار ݙیندے ہوئیں انہاں ہائنان دی کمپنیاں تے پاکستان دے صنعتی و برآمدی شعبیاں دے درمیان روابط ودھاوݨ تے زور ݙتا تانجو ݙوپاسہ تجارت اچ اضافہ تھی سڳے‏۔ سانیا اچ تھیوݨ آلے چھینویں ایشین بیچ گیمز اچ پاکستانی کھلاݙیاں دی شرکت ہک مثبت پیش رفت اے‏۔ ہائنان قیادت دے نال تجارت تے سرمایہ کاری دے روابط ٻئے گہرے کرݨ دی خواہش اے‏۔اے ڳالھیں صدرِ مملکت آصف علی زرداری دورہِ چین دے دوران ہائنان دے پارٹی سیکرٹری فینگ فئی، صوبے دے گورنر لیو شیائومنگ تے شہر سانیا دے پارٹی سیکرٹری وانگ چی یانگ نال ملاقات دے دوران کیتا‏۔ ایں موقع تے پاکستان تے ہائنان دے درمیان معاشی تعاون کوں فروغ ݙیوݨ، تجارتی روابط ودھاوݨ تے عوامی سطح تے تبادلیاں کوں مضبوط بݨاوݨ تے ڳالھ مہاڑ کیتی گئی‏۔صدرِ مملکت آکھیا جو انھاں دے خاندان دے چین نال تعلقات ترائے نسلاں توں ہن، جنہاں دا آغاز انھاں دے مرحوم سہر ذوالفقار علی بھٹو تے بینظیر بھٹو توں تھیا تے ہݨ انھاں دے صاحبزادے بلاول بھٹو زرداری تے صاحبزادی آصفہ بھٹو زرداری تئیں جاری اے‏۔ ڈوہائیں پاسوں علاقائی تے عالمی معاملیاں تے وی ڳالھ مہاڑ کیتی تے امن، استحکام تے تعاون دے فروغ دے عزم کوں دہرایا‏۔پارٹی سیکرٹری فینگ فئی صدر اتے انھاں دے وفد کوں جی آیاں کوں آکھیا تے چین نال پاکستان دی پرانی دوستی دی تعریف کیتی‏۔ انہاں ہائنان دی فری ٹریڈ پورٹ دے طور تے ترقی کوں اجاگر کیتا‏۔ انہاں ݙسایا جو دسمبر 2025ء اچ خصوصی کسٹمز آپریشنز دے آغاز دے بعد ہائنان اچ غیر ملکی سرمایہ کاراں دی تعداد وچ وݙا اضافہ تھیے‏۔ انہاں آکھیا جو ایں عرصے دے دوران پاکستان تے ہائنان دے درمیان تجارت تقریباً دوگنی تھی ڳئی اے۔سیکرٹری فینگ آکھیا جو ایں ویلھے ہائنان دی مختلف یونیورسٹیاں اچ 500 توں زیادہ پاکستانی طلبہ تعلیم حاصل کریندے پئن‏۔ انہاں مزید آکھیا جو چین دی سب توں وݙی بیج افزائش لیبارٹری ہائنان اچ اے جتھاں جدید ٹیکنالوجی استعمال تھیندی پئی اے تے ایں شعبے اچ پاکستان نال تعاون دے وݙے امکانات موجود ہن‏۔ملاقات اچ سینیٹر سلیم مانڈوی والا، سینئر صوبائی وزیر شرجیل انعام میمن، علی حسن بروہی، سید قاسم نوید قمر، چیف سیکرٹری سندھ، پاکستان اچ چین دے سفیر جیانگ زائی دونگ تے چین وچ پاکستان دے سفیر خلیل ہاشمی سمیت ٻئے حکام وی شریک ہن‏۔ ملاقات دے بعد صدرِ مملکت دے اعزاز اچ عشائیہ وی ݙتا گیا‏۔