پورے ملک اچ 2 توں 5 مئی تئیں اندھاری، ڳاڄ کھمݨ، ژالہ باری تے بارشاں دا امکان، محکمہ موسمیات

اسلام آباد۔ 1 مئی (اے پی پی)  محکمہ موسمیات پاکستان ملک دے مختلف حصیاں اچ 2 مئی دی شام توں 5 مئی دی سویل تئیں ہک نویں مغربی سلسلے دے تحت شدید موسمی سرگرمیاں دا الرٹ جاری کر ݙتے‏۔ محکمہ موسمیات دے مطابق ایں دوران بالائی تے وسطی علاقیاں اچ اندھاری، ڳاڄ کھمݨ، موسلا دھار بارش تے ژالہ باری (ڳڑے مارݨ) دا امکان اے، جیندے پیشِ نظر متعلقہ اداریاں تے عوام کوں احتیاطی تدابیر اختیار کرݨ دی ہدایت کیتی ڳئی اے‏۔ محکمہ موسمیات دے مطابق خیبر پختونخوا ایں موسمی نظام توں سب توں ودھ متاثر ہووݨ آلا صوبہ ہوسی، جتھاں چترال، دیر، سوات، کالام، شانگلہ، بونیر، کوہستان، مالاکنڈ، بٹگرام، مانسہرہ، ایبٹ آباد، بالاکوٹ، ہری پور، مردان، نوشہرہ، پشاور، باجوڑ، مہمند، اورکزئی، خیبر، صوابی، چارسدہ، کوہاٹ، کرم، ہنگو، کرک، بنوں، لکی مروت، ٹانک، ڈیرہ اسماعیل خان تے وزیرستان اچ 2 مئی دی شام توں 4 مئی تئیں وقفے وقفے نال اندھاری اتے ڳاڄ کھمݨ نال بارش تے کجھ مقامات تے ژالہ باری متوقع اے‏۔ پنجاب تے وفاقی دارالحکومت اسلام آباد وچ وی موسم دی شدت برقرار رہݨ دا امکان اے‏۔ مری، گلیات، راولپنڈی، اٹک، چکوال، جہلم، خوشاب، سرگودھا، میانوالی، بھکر، فیصل آباد، ساہیوال، جھنگ، لاہور، گوجرانوالہ، سیالکوٹ تے نارووال وچ 2 مئی دی شام توں 4 مئی دی رات تئیں اندھاری اتے ڳاڄ کھمݨ نال بارش جݙݨ جو کجھ جاہیں تے ژالہ باری دی پیشگوئی کیتی ڳئی اے‏۔ جنوبی پنجاب دے علاقیاں ڈیرہ غازی خان، راجن پور، لیہ، ملتان تے خانیوال اچ 3 تے 4 مئی کوں اندھاری اتے بارش نال ڳاج کھمݨ دا امکان ظاہر کیتا ڳئے۔گلگت بلتستان دے اضلاع دیامر، استور، غذر، اسکردو، ہنزہ، گلگت، گانچھے تے شگر اچ 2 مئی دی رات توں 5 مئی تئیں بارش تے گرج چمک دا سلسلہ جاری رہݨ دا امکان اے جݙݨ جو آزاد کشمیر دے علاقیاں نیلم ویلی، مظفرآباد، پونچھ، ہٹیاں، باغ، حویلی، سدھنوتی، کوٹلی، بھمبر تے میرپور وچ وی ایں دوران موسلا دھار بارش تے ژالہ باری دی پیشگوئی کیتی گئی اے‏۔ بلوچستان دے علاقیاں کوئٹہ، زیارت، چمن، قلعہ عبداللہ، قلعہ سیف اللہ، کوہلو، ژوب، بارکھان تے لورالائی اچ 2 توں 4 مئی دے دوران آندھی تے گرج چمک نال بارش متوقع اے جݙݨ جو بالائی سندھ اچ 2 تے 3 مئی کوں گرد آلود ہوائیں تے ڳاڄ کھمݨ دا امکان اے‏۔ محکمہ موسمیات خبردار کیتے جو تیز ہوائیں، ژالہ باری تے اسمانی بجلی کمزور تعمیرات، بجلی دے کھمبیاں، بل بورڈز تے سولر پینلز کوں نقصان پڄا سڳدی اے‏۔ بالائی خیبر پختونخوا، گلگت بلتستان تے کشمیر دے پہاڑی علاقیاں اچ 3 تے 4 مئی کوں لینڈ سلائیڈنگ دا وی خدشہ ظاہر کیتا ڳئے‏۔ کاشتکاراں کوں ہدایت کیتی گئی اے جو او آپݨی کھڑی فصلاں کوں ممکنہ نقصان توں بچاوݨ کیتے پیشگی اقدامات کرن جݙݨ جو سیاحاں تے مسافراں کوں غیر ضروری سفر توں گریز تے احتیاط کرݨ دا مشورہ ݙتا ڳئے‏۔ محکمہ موسمیات دے مطابق ایں موسمی نظام دی وجہ توں ملک دے میدانی علاقیاں اچ جاری شدید گرمی دی لہر اوچ ڳھٹکی دا امکان اے‏۔