سی ٹی ڈی پنجاب کالعدم تنظیماں دے 21 دہشت گرداں کوں گرفتار کر ڳھدا

لاہور۔ 2 مئی (اے پی پی) صوبہ پنجاب اچ کاؤنٹر ٹیررازم ڈیپارٹمنٹ (سی ٹی ڈی) پنجاب دے مختلف علاقیاں اچ کارروائیاں دے دوران مختلف کالعدم تنظیماں توں تعلق رکھݨ آلے 21 دہشت گرداں کوں گرفتار کر دے دہشت گردی دا وݙا منصوبہ ناکام بݨا ݙتا‏۔ لاہور توں فتنہ الخوارج دا خطرناک دہشت گرد پیر شمس جݙݨ جو ٹوبہ ٹیک سنگھ توں بی ایل اے دا عبداللطیف دھماکہ خیز مواد سمیت گرفتار کر ڳھدا ڳیا‏۔ ترجمان دے مطابق سی ٹی ڈی پنجاب دہشت گردی دے کہیں وی ناخوشگوار واقعے نال نبڑݨ کیتے صوبے دے مختلف ضلعیاں اچ انٹیلی جنس دی بنیاد تے 214 کارروائیاں کیتیاں، جنھاں اچ 215 مشتبہ بندیاں توں پچھ ڳچھ کیتی ڳئی اتے 21 دہشت گرداں کوں اسلحہ، دھماکہ خیز مواد تے ٻئے ممنوعہ مواد سمیت گرفتار کیتا‏۔ گرفتار دہشت گرداں اچ مصباح، سمیع اللہ، گلاب خان، طور خان، زرین شاہ، عبداللطیف، خیال محمد، محمد نبیل، پیر شمس، انعام اللہ، عظیم اللہ تے خان بادشاہ وغیرہ شامل ہن‏۔ انھاں دا تعلق فتنہ الخوارج تے ٻیاں دہشت گرد تنظیماں نال اے‏۔ گرفتار دہشت گرداں دا تعلق لاہور، خوشاب، گوجرانوالہ، ٹوبہ ٹیک سنگھ، فیصل آباد، ملتان، بہاولپور، پاکپتن، جھنگ تے میانوالی توں اے‏۔ دھماکہ خیز مواد 6330 گرام، ڈیٹونیٹر 17، سیفٹی فیوز وائر 39 فٹ، آئی ای ڈی بم 1، کالعدم تنظیم دے پمفلٹ، میگزین، موبائل فون تے نقدی دہشت گرداں دے قبضے توں برآمد کر ڳھدی ڳئی اے‏۔ ترجمان ݙسایا جو دہشت گرد مختلف جاہیں تے دہشت گردی کر تے شہریاں اچ خوف کھنڈاوݨ چاہندے ہن‏۔ انہاں آکھیا جو گرفتار دہشت گرداں دے خلاف 20 مقدمات درج کر تے انھاں توں ٻئی تفتیش کیتی ویندی پئی اے‏۔ مقامی پولیس دے تعاون نال 5040 کومبنگ آپریشن وی کیتے ڳئے، 18932 بندیاں کوں چیک کیتا ڳیا اتے 587 مشتبہ بندیاں کوں گرفتار کیتا ڳیا‏۔ سی ٹی ڈی پنجاب محفوظ پنجاب دے آپݨے ہدف تے پوری طرح کم کریندی پئی اے‏۔