وزیرِ خزانہ دی صدارت رئیل اسٹیٹ انویسٹمنٹ ٹرسٹ دی بڑھوتری تے کیپٹل مارکیٹ دی ترقی دے متعلق ورچوئل اجلاس

اسلام آباد۔ 2 مئی (اے پی پی) وفاقی وزیرِ خزانہ تے محصولات سینیٹر محمد اورنگزیب دی صدارت رئیل اسٹیٹ انویسٹمنٹ ٹرسٹ (آر ای آئی ٹیز) دی ترقی اچ مدد تے سہولت ݙیوݨ دے حوالے نال فوکس گروپ دا ورچوئل اجلاس تھیا‏۔ اجلاس اچ آر ای آئی ٹیز فریم ورک دی مضبوطی، معاشی سرگرمیاں تے کیپٹل مارکیٹ دی ترقی کوں ودھاوݨ دے اقدامات دا جائزہ گھنݨ کیتے سرکاری تے نجی شعبیاں دے اہم اسٹیک ہولڈرز وی شریک تھئے‏۔ فنانس ڈویژن دے مطابق، اجلاس دے شرکاء کوں جی آیاں کوں آکھیندے ہوئیں وفاقی وزیرِ خزانہ اسٹیک ہولڈرز دی بھرپور شمولیت دی تعریف کیتی اتے پالیسی ڳالھ مہاڑ اچ کاروباری برادری، مالیاتی اداریاں تے مارکیٹ دے شرکاء دے تعمیری کردار کوں سراہیا‏۔ انہاں مسلسل تے منظم مشورے دی اہمیت تے زور ݙتا تانجو اے یقینی بݨایا ونڄ سڳے جو اصلاحات دی کوششاں مارکیٹ دی ضرورتاں دے مطابق ہوون تے وݙے معاشی ہدف دے نال جڑیاں ہوون‏۔ اجلاس اچ آر ای آئی ٹیز سیکٹر دی ترقی تے ایندے پھیلاؤ دے اہم شعبیاں تے ڳالھ تھئی‏۔ شرکاء ٹیکسیشن فریم ورک کوں بہتر بݨاوݨ، آر ای آئی ٹی جاری کرݨ آلیاں دی سہولت دے عمل اچ بہتری تے سرمایہ کاراں دی شرکت کوں ودھاوݨ کیتے مجموعی طور تے مارکیٹ ایکو سسٹم کوں مضبوط بݨاوݨ دا وی جائزہ ڳھدا‏۔ ایں موقع تے متوازن سرمایہ کاری کیتے سازگار ماحول برقرار رکھݨ تے زور ݙتا گیا‏۔اجلاس دے شرکاء آکھیا جو پاکستان اچ آر ای آئی ٹی مارکیٹ شروع اچ کجھ ترقی کیتی اے پر پالیسی اقدامات تے بہتر ہم آہنگی دے ذریعے اینکوں ٻیا ودھاوݨ دی ٻہوں صلاحیت اجاں باقی اے‏۔ انہاں طریقہ کار دے مسئلیاں دے خاتمے، ریگولیٹری شرطاں اچ وضاحت تے اسٹیک ہولڈرز وچال ہکا سوچ (صف بندی) دے فروغ کوں ایں شعبے کیتے اہم قرار ݙتا‏۔اجلاس اچ پاکستان دے آر ای آئی ٹی فریم ورک کوں بین الاقوامی طریقیاں دے مطابق بݨاوݨ تے زور ݙتا گیا اتے آکھیا گیا جو سادگی، وضاحت تے عمل درآمد اچ آسانی کوں برقرار رکھا ونڄے‏۔ اجلاس اچ عارف حبیب کارپوریشن لمیٹڈ دے چیف ایگزیکٹو عارف حبیب، ڈولمین گروپ دے ندیم ریاض، ٹی پی ایل کارپوریشن دے علی جمیل، کمشنر ایس ای سی پی، سیکریٹری ہاؤسنگ اینڈ ورکس ڈویژن تے وزارتِ خزانہ دے اعلیٰ حکام شریک ہن‏۔