معرکہ حق اچ کامیابی دے بعد پاکستان عالمی سطح تے امن دا علمبردار بݨ کراہیں ابھریے، عطاء اللہ تارڑ

اسلام آباد۔ 2 مئی (اے پی پی) وفاقی وزیرِ اطلاعات تے نشریات عطاء اللہ تارڑ آکھیا جو معرکہ حق اچ کامیابی دے بعد پاکستان دنیا اچ امن دے علمبردار دے طور تے ابھریے‏۔ پاکستان سفارتی تے بیانیہ دے محاذ تے اہم کامیابیاں حاصل کیتن‏۔ ہفتہ کوں ایتھاں مقامی ہوٹل اچ “Talking Narratives .. Marka e Haq” دے عنوان نال تھیوݨ آلی تقریب نال خطاب کریندے ہوئیں وفاقی وزیر آکھیا جو بیانیہ تے عسکری سطح تے پاکستان دی عزت تے وقار مزید مضبوط تھیے، جتھاں پاکستانی پاسپورٹ تے سبز ہلالی پرچم کوں وی احترام دی نگاہ نال ݙٹھا ویندے‏۔ اج پوری دنیا اچ لوک پاکستان دے نال وابستگی تے فخر محسوس کریندن‏۔ انہاں آکھیا جو سرحد دے اوں پار (بھارت اچ) اندھارا، تنہائی، ناکامی تے رسوائی دے سوا کجھ کائنی‏۔ اساں سݨدے ہاسے جو انھاں دنیا اچ ٻہوں لابنگ کر ڳھدی اے پر اساݙے جے ٹین سی طیاریاں تے فتح میزائل نے دشمن دی کوڑی چمک دمک کوں سوا (راکھ) بݨا ݙتے‏۔ ایندا نتیجہ اے نکلیا جو اج پاکستان ہک باوقار مقام تے کھڑے جݙݨ جو مشرقی پاسے چُپ تے اندھارا چھایا ہوئے‏۔ عطاء اللہ تارڑ آکھیا جو معرکہ حق کئی محاذوں تے لڑیا ڳیا‏۔ جݙݨ وزیراعظم شہباز شریف پی ایم اے کاکول اچ دنیا دے سامݨے اے موقف رکھیا جو پہلگام واقعہ ہک “فالس فلیگ آپریشن” ہئی تے ایندی شفاف تحقیقات تھیوݨی چاہیدی اے، تاں اوندے دا کوئی جواب نہ آیا، کیونجو اے واقعہ اتنے بھونڈے طریقے نال کیتا ڳیا ہئی جو صرف ݙاہ منٹ دے اندر ایف آئی آر درج کر ݙتی ڳئی، جیندے نال پورا معاملہ ہک مخول (مذاق) بݨ گیا‏۔ ایندے باوجود پاکستان ہک ذمہ دار ریاست دے طور تے پہلگام واقعے تے افسوس دا اظہار کیتا‏۔ انہاں آکھیا جو پاکستان دہشت گردی دے خلاف پہلی صف اچ کھڑے جݙݨ جو مشرقی سرحد ولوں پاکستان اچ دہشت گردی دے واقعیاں دی مذمت تاں دور دی ڳالھ اے، کݙاہیں تشویش وی ظاہر کائنی کیتی ڳئی‏۔ ہک پاسے پاکستان اے جیڑا دہشت گردی دے خلاف ڈٹیا ہوئے اتے اساݙا ہر طبقہ قربانیاں ݙیندا پئے‏۔ فوج، پولیس تے ٻئے ادارے ایں جنگ اچ شامل ہن‏۔ انہاں آکھیا جو ساݙے کول اتنی بردباری اے جو جݙݨ انھاں دا پائلٹ (ابھی نندن) اساݙے قبضے اچ آیا تاں اساں اوکوں چاہ پلائی تے عزت نال واپس کیتا‏۔ اے ہک عجیب قوم اے، انھاں دا جہاز ڈھے ڳیا، اساں پائلٹ واپس کیتا اتے او واپس ونڄ کراہیں ایوارڈ گھیندا پئے‏۔ وفاقی وزیر آکھیا جو بھارت دہشت گردی دی سرپرستی کریندے جݙݨ جو پاکستان ایندا مقابلہ کریندے پئے‏۔ کینیڈا اچ سکھ رہنما ہردیپ سنگھ نجر دے قتل دا واقعہ دنیا دے سامݨے اے‏۔ سکھاں دے خلاف کارروائیاں صرف بھارتی پنجاب تئیں محدود کائنی بلکہ برطانیہ، کینیڈا تے امریکہ تئیں کھنڈ ڳئن۔ انہاں آکھیا جو معرکہ حق دی تاریخ اچ اساݙے نینگراں (جنریشن زی) تے سوشل میڈیا انفلوئنسرز دا کردار سنہری لفظاں نال لکھیا ویسی‏۔ ہک پاسے روایتی جنگ ہئی تاں ݙوجھے پاسے “میم وار” (Meme War) چلدی پئی ہئی‏۔ اساݙے نینگراں بھارتی میڈیا دا مکروہ چہرہ بے نقاب کر ݙتا‏۔ بھارتی میڈیا اتنا کوڑ ماریا جو انھاں لاہور تے ملتان دی بندرگاہواں تباہ کرݨ دے دعوے وی کر ݙتے (حالانکہ ملتان تے لاہور اچ سمندر کائنی)‏۔ انہاں آکھیا جو جݙݨ بھارت اساݙے یوٹیوب چینل بند کیتے تاں اساں جواب اچ انھاں دے چینل بند کائنی کیتے، بلکہ انھاں دے یوٹیوب چینلاں تے آپݨے ملی نغمے چلا کراہیں آپݨا موقف دنیا تئیں پڄایا۔ عطاء اللہ تارڑ آکھیا جو فیلڈ مارشل سید عاصم منیر دی جنگی حکمتِ عملی تے وزیراعظم دا وژن تاریخ دا اہم باب اے‏۔ جݙݨ حملہ تھیا تاں پاکستان دشمن دے اٹھ جہاز سٹ ݙتے‏۔ ایئر چیف مارشل ظہیر احمد بابر سدھو تے انھاں دی ٹیم ملک دا بھرپور دفاع کیتا‏۔ 10 مئی کوں جݙݨ “آپریشن بنیان مرصوص” دے تحت جواب ݙتا ڳیا تاں بھارتی فوجی ترجمان دے چہرے لہہ ڳئے ہن‏۔ پاکستان فجر دے ویلھے نماز دے بعد اللہ توں دعا منگ کراہیں کارروائی شروع کیتی ہئی‏۔ اج پوری قوم فتح دا جشن منیندی پئی اے‏۔انہاں آکھیا جو آزاد کشمیر اچ رہائشی کمپلیکس تے بمباری نال ہک معصوم ٻال شہید تھیا جݙݨ جو بہاولپور تے مریدکے اچ وی اساݙے ٻال تے شہری شہید تھئے۔ ݙوجھے پاسے بھارت ولوں مسلسل اشتعال انگیز بیانات ݙتے ویندے رہیے۔ پاکستانی فوج دی کارروائی دے بعد ایہے عناصر چند گھنٹیاں دے اندر گھٹنے ٹیک کراہیں جنگ بندی دی ڳالھ کرݨ لڳ پئے۔ اوہے ٹی وی سکریناں ہن تے اوہے چہرے ہن، پر اعتماد مک ڳیا ہئی۔ پاکستان دے فیصلہ کن جواب کوں او چار گھنٹے وی برداشت نہ کر سڳے۔انہاں آکھیا جو اوں رات دنیا ݙٹھا جو جݙݨ انھاں پاکستان تے حملہ کیتا تاں بعد اچ انھاں دے جہازاں دا ملبہ بلڈوزر دے ذریعے چا کراہیں نیتا ویندا پیا ہئی۔ وفاقی وزیر آکھیا جو پاکستان رات دے اندھارے اچ جواب کائنی ݙتا بلکہ فجر دے ویلھے نماز پڑھݨ دے بعد اللہ تعالیٰ توں دعا منگ کراہیں کارروائی شروع کیتی۔ انہاں آکھیا جو جݙݨ فتح میزائل آپݨے ہدف (ٹارگٹ) دو ڳئے تاں انھاں فتح دی خوشخبری سݨائی۔ انہاں آکھیا جو اللہ تعالیٰ دا شکر اے جو ایں واقعے کوں ہک سال پورا تھی ڳئےا تے پوری قوم اج فتح دا جشن منیندی پئی اے۔انہاں آکھیا جو پاکستان دا مستقبل روشن اے تے ہک سال اچ ملک کوں جیڑھی عزت ملی اے او ٻئی ودھسی۔ انہاں دعا کیتی جو پاکستان ترقی کرے، پھلے پھولے تے آوݨ آلی نسلاں کوں او ملک ملے جیندا خواب علامہ محمد اقبال ݙٹھا ہئی اتے جینکوں قائداعظم محمد علی جناح عملی شکل ݙتی ہئی۔