پاکستان تیکھے مقامی ویکسین ٻݨاوݨ دے قابل تھی ویسی، فاقی وزیر صحت

اسلام آباد۔4  مئی(اے پی پی)وفاقی وزیر برائے قومی صحت مصطفیٰ کمال آکھیے جو قومی ویکسین پالیسی دی منظوری ملکی تاریخ دا اہم سنگ میل اے جیندے نال پاکستان مقامی سطح تے ویکسین ٻݨاوݨ دے قابل تھی ویسی۔ انہاں اے ڳالھ وفاقی ڈرگ ریگولیٹری اتھارٹی آف پاکستان (ڈریپ) دے دورے ویلھے آکھی۔ انہاں ہک اجلاس دی وی اڳواݨی کیتی جیندے اچ فیڈرل سیکرٹری ہیلتھ، ایڈیشنل سیکرٹری ہیلتھ، ڈی جی ہیلتھ اتے چیف ایگزیکٹو آفیسر ڈریپ سودھا اعلیٰ حکام شرکت کیتی۔ اجلاس اچ ٹریک اینڈ ٹریس سسٹم دے تحت 2D بارکوڈ دے نفاذ تے تھیوݨ والی پیش رفت دا تفصیلی جائزہ ڳھدا گیا اتے ڈریپ ولوں جاری آٹومیشن اقدامات دا وی معائنہ کیتا گیا۔ اجلاس اچ قومی ویکسین پالیسی دی منظوری دے بعد اگلے لائحہ عمل، انڈونیشیا نال مفاہمتی یادداشت تے پیش رفت اتے گلوبل بینچ مارکنگ فار نیشنل ریگولیٹری سسٹم نال جڑے اقدامات دا جائزہ ڳھدا ڳیا۔ وفاقی وزیر صحت آکھیا جو او ڈبلیو ایچ او دے گلوبل بینچ مارکنگ سسٹم دے موثر نفاذ کیتے صوبائی حکومتاں نال آپ کوآرڈینیشن کریسن۔ اجلاس اچ نیشنل کنٹرول لیبارٹری فار بائیولوجیکل دی اپ گریڈیشن اتے ڈریپ اچ جاری بھرتیاں دے عمل تے وی پیش رفت دا جائزہ گھدا گیا۔ ایں موقع تے وفاقی وزیر صحت مصطفیٰ کمال آکھیا جو ڈریپ اچ جاری اصلاحات دے مثبت اثرات سامݨے آندے پئن اتے ادارے کوں عالمی معیار دے مطابق ہک موثر ریگولیٹری اتھارٹی ٻݨاوݨ تے کم تھیندا پئے، ڈریپ ڈبلیو ایچ او دے لیول تھری سٹیٹس دے حصول کیتے اقدامات ودھاوے جیندے بعد پاکستانی دوائیاں کوں دنیا دے 150 ملکاں تئیں رسائی حاصل تھی سگسی، ایں ویلھے پاکستان دیاں دوائیاں 51 ملکاں کوں برآمد کیتاں ویندیاں پئن، ایندے نال برآمدات ودھیسن اتے ملکی معیشت وی مضبوط تھیسی۔