وزیراعظم شہباز شریف دی وزارتِ صحت کوں ہیپاٹائٹس اتے ایڈز دی رپورٹنگ کیتے مربوط نظام ٻݨاوݨ دی ہدایت

اسلام آباد۔ 5 مئی(اے پی پی)وزیراعظم محمد شہباز شریف وزارتِ قومی صحت کوں صوبائی حکومتاں دے تعاون نال ہیپاٹائٹس، ایڈز اتے ٻئے بیماریاں دی ویلے سر رپورٹنگ کیتے ہک مربوط نظام ٻݨاوݨ دی ہدایت کریندے آکھیے جو صحت کیتے بہترین سہولتاں ݙیوݨ حکومت دی پہلی ترجیح اے۔ انھاں اے ڳالھ وزارتِ قومی صحت دے معاملیاں دے حوالے نال جائزہ اجلاس دی صدارت کریندے آکھی۔ اجلاس اچ وفاقی وزیر اقتصادی امور احد خان چیمہ، وزیر خزانہ محمد اورنگزیب، وفاقی وزیر قومی صحت سید مصطفیٰ کمال، وزیر مملکت برائے صحت ڈاکٹر مختار احمد بھرتھ، وزیراعظم دی فوکل پرسن برائے انسداد پولیو سینیٹر عائشہ رضا فاروق اتے ٻئے اعلیٰ افسران شریک تھئن۔ وزیراعظم آکھیے جو شہریاں دی صحت کیتے بہترین خدمات ݙیوݨ حکومتِ دی ترجیح اے۔ انھاں آکھیے جوہ کہیں وی ہک قیمتی جان کوں بچاوݨ کیتے اساں ہر حد، ہر رکاوٹ اتے ہر قربانی کوں تیار ہیں۔ وزیراعظم ہدایت کیتی جو سارے سرکاری ہسپتالاں اچ ہیپاٹائٹس اتے ایڈز ڄھئیں موذی مرضاں دے مکمل خاتمے کیتے سارے مریضاں دی سکریننگ یقینی ٻݨائی ونڄے، ویلھے سر سنڄاݨ نال ای انھاں بیماریاں کون مکایا ونڄ سڳدے۔ انھاں ہدایت کیتی جو ہیپاٹائٹس دی سکریننگ، ٹیسٹنگ اتے علاج کیتے وزارتِ صحت صوبیاں نال رل تے “وزیراعظم ہیپاٹائٹس کنٹرول پروگرام” کوں نافذ کرݨ اچ تیزی ڳھن آوے۔ وزیراعظم وائرل بیماریاں دے کھنڈݨ کوں روکݨ کیتے پورے ملک اچ آٹو ڈسیبل (AD) سرنج دا استعمال کرݨ اتے ڈریپ سودھا ٻئے اداریاں کوں سرنج دے ول ول استعمال کوں مکمل طور تے روکݨ دی ہدایت کیتی اے۔ انہاں پولیو مکاوݨ دا وی عزم دوہرایا۔ اجلاس اچ پولیو، ہیپاٹائٹس اتے ایڈز مکاوݨ کیتے جاری اقدامات تے بریفنگ ݙتی گئی جو ایڈز دے خاتمے کیتے ملک دے وݙے ہسپتالاں اچ 98 اینٹی ریٹرو وائرل تھراپی سینٹرز بݨ چکین، جیندی تعداد ہک سال اچ ودھا تے 164 کر ݙتی ویسی۔ بیرون ملک توں ولݨ آلے غیر قانونی تارکینِ وطن کیتے سارے بین الاقوامی ہوائی اڈیاں تے ایڈز سکریننگ دی سہولت شروع اے۔ بریفنگ دے مطابق، وزیراعظم قومی پروگرام برائے انسدادِ ہیپاٹائٹس سی دا آزمائشی منصوبہ تیکھے اسلام آباد، آزاد کشمیر اتے گلگت بلتستان اچ شروع کیتا ویسی، ماحولیاتی نمونیاں دے حالیہ ٹیسٹاں اچ پولیو وائرس دی موجودگی اچ ہولے ہولے کمی آندی پئی اے اتے اڄوکی انسدادِ پولیو مہم اچ کوریج 98 فیصد رہی اے۔