معرکہ حق دے بعد پاکستان ٻیا مضبوط تھی تے ابھریے، دشمناں دی کہیں وی جارحیت دا سخت جواب ݙتا ویسی، وزیر دفاع خواجہ آصف

خبرنمبر:22

اسلام آباد۔ 5 مئی (اے پی پی) وزیر دفاع خواجہ محمد آصف آکھیے جو معرکہ حق دے بعد پاکستان پہلے توں ودھ طاقتور بݨ تے اٻھریے، دشمن دی کہیں وی مہم جوئی دا منہ تروڑ جواب ݙتا ویسی۔ انہاں اے ڳالھ وزارت اطلاعات ولوں کتاب “The Battle of Truth” دی تقریبِ رونمائی نال خطاب اچ آکھی۔ خواجہ آصف آکھیا جو اے کتاب صرف کاغذاں دا پلندا کائنی ٻھل قوم دے عزم اتے قربانیاں دی جیندی ڄاڳدی داستان اے۔ دنیا گواہ اے جو پاکستان ہمیشہ امن کیتے کم کیتے، جݙاں جو بھارت دی “ہندوتوا” سامراجی ذہنیت خطے دے امن اچ وݙی رکاوٹ اے۔ انہاں آکھیا جو بھارت اپݨے اندرونی خلفشار کوں دٻاوݨ کیتے سرحداں تے جنگ دا ماحول ٻݨائی رکھدے۔ وزیر دفاع یاد ݙوایا جو 2019 اچ پلوامہ دا ڈرامہ رچا تے پاکستان تے حملے دی کوشش کیتی گئی ہئی، ٻھل پاکستان دے دندان شکن جواب دا کوئی مقابلہ نہ ہئی۔ انہاں آکھیا جو دشمن آپݨی سبکی مٹاوݨ کیتے “ففتھ جنریشن وار” دے ذریعے عوام اتے فوج اچ تفرقہ پاوݨ دی کوشش کیتی، پر او نئیں ڄاݨدے جو پاک فوج اتے عوام دی محبت کوں کوئی وی سازش ختم نئیں کر سڳدی۔ آپریشن “سندور” دے جواب اچ پاکستان دی عوام مذہبی اتے سیاسی فرق توں ہٹ تے فوج دے نال کھڑی تھی گئی اتے “بنیان مرصوص” ٻݨ تے دشمن دے ناپاک ارادے مٹی اچ ملا ݙتے۔ ساݙے میزائل دشمن تے قہر ٻݨ تے ترٹ پئے تے ایس-400 دا تکبر خاک اچ مل گیا۔ خواجہ آصف آکھیا جو پاکستان ہݨ خطے اچ استحکام دی ضمانت ٻݨ چکیے، اساں بھارت اتے ایندے ایجنٹاں دے ہر چیلنج دا مقابلہ کرݨ کیتے تیار ہیں۔ ایں موقع اتے ڈاکٹر نفیسہ شاہ، سینیٹر پلوشہ خان، لیفٹیننٹ جنرل (ر) عامر ریاض اتے زہرین خان مگسی وی خطاب کیتا اتے معرکہ حق کوں سچائی دی فتح قرار ݙتا۔