ڄڳ پاکستان تے تاریخی اعتماد ݙکھائے، امن کیتے کردار نٻھیندے راہسوں، وزیراعظم شہباز شریف دا “بین الاقوامی پیغامِ اسلام کانفرنس” نال خطاب

اسلام آباد۔ 6 مئی (اے پی پی)وزیراعظم محمد شہباز شریف امریکا اتے ایران وچال مذاکرات دے دیرپا امن اچ بدلݨ دے یقین دا اظہار کریندے آکھیے جو ڄڳ پاکستان تے تاریخی اعتماد ݙکھائے،1979ء دے بعد پہلی واری ݙوہیں ملک اسلام آباد اچ مذاکرات دی میز تے ٻیٹھن، پاکستان امن کیتے کردار نٻھیندا رہسیانہاں اے ڳالھ اسلام آباد اچ پاکستان علما کونسل ولوں چھیویں بین الاقوامی پیغامِ اسلام کانفرنس نال خطاب اچ آکھی۔ کانفرنس اچ وفاقی وزراء، فلسطین دے قاضی القضاۃ ڈاکٹر محمود الہباش، مفتی اعظم مقبوضہ بیت المقدس شیخ محمد احمد حسین، سعودی سفیر نواف بن سعید المالکی، چیئرمین پاکستان علما کونسل مولانا طاہر محمود اشرفی اتے مختلف مکاتبِ فکر دے علمائے کرام شرکت کیتی۔ اپݨے خطاب اچ وزیراعظم آکھیا جو 11 اتے 12 اپریل کوں پاکستان دی دعوت تے ایران اتے امریکا دے وفود پاکستان آئے، فریقین عارضی جنگ بندی تے متفق تھئن اتے ثالثی کیتے پاکستان دی دعوت قبول کیتی، اے ہک تاریخی اعتماد اے جیندی مثال حالیہ تاریخ اچ نئیں ملدی، 1979ء دے بعد اے پہلا موقع اے جو امریکی اتے ایرانی قیادت آمݨے سامݨے اسلام آباد اچ مذاکرات کیتے ٻیٹھن، اے عالمِ اسلام اتے دنیا دے امن کیتے پاکستان دی ہک وݙی خدمت اے۔ شہباز شریف سعودی ولی عہد شہزادہ محمد بن سلمان کوں خراجِ تحسین پیش کیتے جو انہاں ایں امن عمل اچ بھرپور کردار ادا کیتے۔ انہاں چین اتے ترکیہ دے تعاون دا وی شکریہ ادا کیتا۔ وزیراعظم آکھیا جو نائب وزیراعظم اسحاق ڈار شاندار کردار ادا کیتے، تے فیلڈ مارشل سید عاصم منیر فریقین کوں جنگ بندی تے آمادہ کرݨ تے مذاکرات دی میز تے ٻلہاوݨ کیتے ݙینہہ رات محنت کیتی، جیکوں تاریخ یاد رکھیسی۔ انہاں آکھیا جو حرمین شریفین دی ارضِ پاک دا تحفظ، دفاع اتے سلامتی ساݙے کیتے مقدم اے، سعودی عرب نال باہمی دفاعی معاہدہ ساݙے آہنی عزم دی تجدید اے۔ وزیراعظم آکھیا جو اسلام امن دا دین اے اتے تفرقے کوں مسترد کریندے۔ پشاور توں کراچی تئیں پوری قوم ہک مٹھ اے۔ انہاں واضح کیتا جو امت کوں تقسیم کرݨ والے اتے دہشت گردی اچ ملوث عناصر مسلمان اکھواوݨ دے حقدار کائنی۔ انہاں علما کرام توں اپیل کیتی جو امت اچ اتحاد اتے یگانگت ودھاوݨ کیتے کردار ادا کرن۔ پاکستان مسئلہ فلسطین اتے کشمیر تے اپݨے اصولی موقف تے قائم اے۔ وزیراعظم یقین ݙوایا ڄے تئیں کشمیری اتے فلسطینی بھراواں کوں آزادی اتے قانونی حق نئیں ملدا، پاکستان انہاں دا ساتھ ݙیندا رہسی۔