پاکستانی کیڈٹ آسٹریلیا اچ ’بہترین غیر ملکی فوجی کیڈٹ‘ دا اعزاز پا ڳھدے

راولپنڈی۔ 6 مئی(اے پی پی) پاکستانی فوج دے کیڈٹ سَردار ارسام عباس آسٹریلین رائل ملٹری کالج کینبرا اچ تھیوݨ آلی پاسنگ آؤٹ پریڈ اچ’اوورآل بیسٹ فارن ملٹری کیڈٹ‘ دا اعزاز پا تے۔ اے اعزاز 5 مئی 2026 کوں تھیوݨ آلی تقریب اچ انہاں کوں ݙتا ڳئے، جیندے اچ انہاں دی شاندار پیشہ ورانہ کارکردگی اتے اعلیٰ تربیتی معیار منیا ڳئے۔ پاک فوج دے شعبہ تعلقات عامہ (آئی ایس پی آر) دے مطابق اے اعزاز اُنہاں غیر ملکی فوجی کیڈٹس کوں ݙتا ویندے جیرھے تربیت دے سارے شعبیاں اچ سب توں ودھ چنڳی کارکردگی ݙکھاون، کیڈٹ سَردار ارسام عباس (PMA 152 لانگ کورس) دی کامیابی پاکستان آرمی دے جونیئر لیڈرشپ دے اعلیٰ معیار، عزم و پیشہ ورانہ مہارت دا ثبوت ہے۔ پاسنگ آؤٹ پریڈ دی نگرانی آسٹریلین آرمی دے سربراہ لیفٹیننٹ جنرل سائمون اسٹیورٹ کیتی۔ تقریب اچ سفارتی عملے، بشمول پاکستان ہائی کمیشن کینبرا دے نمائنداں، فارغ التحصیل کیڈٹس دے اہلِ خانہ اتے آسٹریلین ڈیفنس فورس دے حکام شرکت کیتی۔ 2013 توں ہݨ تئیں پاکستان آرمی دے 7 افسران رائل ملٹری کالج اچ بطور پلاٹون کمانڈر خدمات انجام ݙے چکین ڄݙاں جو 2009 توں ہݨ تئیں 46 پاکستانی کیڈٹس ایں معتبر ادارے توں فارغ التحصیل تھی چکین۔ اے 14 واں موقع اے جو کہیں پاکستانی آرمی کیڈٹ کوں اے اعزاز ملیے۔ آئی ایس پی آر دے مطابق اے کامیابی پاکستان آرمی اتے پاکستان کیتے وݙے ماݨ دی ڳالھ اے جیڑھی عالمی سطح تے پیشہ ورانہ معیار اتے بہترین تربیت دی عکاس اے۔