ترقی دے عمل اچ ساریاں کوں نال ڳھن تے ٹرݨا ہوسی، پسماندہ علاقیاں اچ دانش سکولاں دے ذریعے ایچی سن دے معیار دی تعلیمی سہولیات ملدیاں پئن، وزیراعظم دا گلگت بلتستان اچ ترقیاتی منصوبیاں دے سنگ بنیاد و افتتاح دی تقریب نال خطاب

خبرنمبر: 01

گلگت۔ 7 مئی(اے پی پی)وزیراعظم محمد شہباز شریف آزاد کشمیر اتے گلگت بلتستان سودھا سارے صوبیاں اتے علاقیاں کوں ہکو جھئیں ترقی کیتے کٹھے ڳھن تے چلݨ دی اہمیت ودھیندے آکھیا جو پسماندہ علاقیاں اچ وی ایچی سن دے معیار دیاں تعلیمی سہولتاں ݙتیاں ویندیاں پئن، جتھاں لائق ٻال مفت تعلیم حاصل کریندے پئن۔ گلگت بلتستان اچ 100 میگاواٹ شمسی توانائی دا منصوبہ آندے سال مکمل تھی ویسی، میرٹ تے لیپ ٹاپ دی فراہمی نال نینگراں کوں اپݨے پیراں تے کھڑا تھیوݨ دے قابل ٻݨایا ویسی۔ پاکستان امریکہ اے ایران دی جنگ رکواوݨ اتے خطے اچ امن کیتے جیہڑا کردار ادا کیتے، تاریخ اوکوں یاد رکھسی۔ قیامِ پاکستان توں بعد اڄ او موقع آئے جو خیبر توں کراچی تئیں پوری قوم ہک مٹھ اے۔ انہاں اے ڳالھ شمسی توانائی دے منصوبیاں، دانش سکولاں دا منݙھ ٻدھݨ، سیف سٹی گلگت اتے سیف سٹی سکردو دے افتتاح، مفت سولر پینلز دی تقسیم، وزیراعظم یوتھ پروگرام دے تحت طلبا کوں لیپ ٹاپس ونݙݨ اتے وزیراعظم یوتھ پروگرام دے تحت کاروباری اتے زرعی قرضیاں دے چیک ݙیوݨ دی تقریب نال خطاب اچ آکھی۔

ایں موقع تے وفاقی وزراء انجینئر امیر مقام، عطا اللہ تارڑ، اویس لغاری، عبدالعلیم خان، گورنر گلگت بلتستان سید مہدی شاہ تے نگران وزیراعلیٰ گلگت بلتستان جسٹس (ر) یار محمد توں علاوہ وزیراعظم دے مشیر رانا ثناء اللہ اتے چیئرمین وزیراعظم یوتھ پروگرام رانا مشہود احمد خان وی موجود ہن۔ وزیراعظم آکھیا جو گلگت بلتستان نہ صرف سوہݨا علاقہ اے ٻھل قابل، محنتی اتے لائق طلبا دا خطہ اے جیہڑے پاکستان دا ماݨ ہین۔ انہاں محنت نال تعلیم حاصل کرݨ آلے ٻالاں دے ماپیوں اتے استاداں کوں خراجِ تحسین پیش کیتا۔ وزیراعظم آکھیا جو 1997ء اچ ڄݙݨ میکوں میݙے قائد محمد نواز شریف اتے میݙی جماعت مسلم لیگ (ن) پنجاب دا خادمِ اعلیٰ ٻݨایا ہا، تݙاں توں اڄ تئیں میں میرٹ تے کوئی سمجھوتہ کائنی کیتا۔ انہاں آکھیا جو ملکی ترقی کیتے محنت، امانت اتے دیانت کوں اپݨا شعار ٻݨاوݨا پوسی۔

ایچی سن دے معیار دی تعلیم دانش سکولاں اچ ݙتی ویندی پئی اے، میݙے تے ٻہوں تنقید تھئی ہئی جو سرکاری سکولاں کوں ٹھیک کرݨ دی بجائے دانش سکولاں تے پیسہ کیوں خرچ کیتا ویندا پئے، ٻھل اڄ ہزاراں ٻال انھاں سکولاں توں پڑھ تے ڈاکٹر اتے انجینئر ٻݨ چکین، ڄیکر امیراں دے ٻال ایچی سن اچ پڑھ سڳدن تاں غریباں دے لائق ٻالاں کوں مفت تعلیم دے موقع کیوں نہ ملن۔ وزیراعظم آکھیا جو گلگت بلتستان دے چارے دانش سکولاں دی ٻالڑیاں کیتے نہ صرف تعلیم مفت ہوسی ٻھل کتاباں، وردی اتے کھاݨا وی مفت ݙتا ویسی، اتے سمارٹ بورڈز تے ای-لائبریری وانڳوں جدید سہولتاں وی ہوسن۔ وزیراعظم آکھیا جو موجودہ حکومت آندے ای شمسی توانائی تے کم شروع کیتا، 15 ہزار گھراں کوں ڈیجیٹل قرعہ اندازی نال مفت سولر پینل ݙتے ویسن۔ وزیراعظم ایران اتے امریکہ دے وچال جنگ بندی کراوݨ اچ پاکستان دے کلیدی کردار دا ݙسیندے نائب وزیراعظم اسحاق ڈار اتے فیلڈ مارشل سید عاصم منیر دی کوششاں کوں سراہیا۔ وزیراعظم سلطان آباد، گانچھے اتے استور اچ دانش سکولاں دا سنگِ بنیاد رکھا اتے ہدایت کیتی جو استاداں دا انتخاب مقامی سطح تے اتے 100 فیصد میرٹ تے کیتا ونڄے۔ وفاقی وزیر اویس لغاری آکھیا جو 32 ارب روپے دی لاگت نال شمسی توانائی دے منصوبے توں 13 لکھ لوکاں کوں فائدہ تھیسی۔