معرکہ حق اچ بھارت دے اہم اہداف ساݙے نشانے تے ہن، وفاقی وزیر داخلہ محسن نقوی دی پریس کانفرنس

اسلام آباد۔7 مئی(اے پی پی) وفاقی وزیر داخلہ محسن نقوی آکھیے جو معرکہ حق اچ بھارت دے اہم اہداف ساݙے نشانے تے ہین، ڄیکر جنگ بندی نہ تھیندی تاں بھارت دا ٻہوں وݙا نقصان تھیوے ہا، بھارت پاکستان دے خلاف مزید کوئی مہم جوئی کرݨ توں پہلے کئی واری سوچیسی۔ انہاں اے ڳالھ وزیرِ مملکت برائے داخلہ طلال چوہدری نال پریس کانفرنس اچ آکھی۔ محسن نقوی آکھیا جو معرکہ حق اچ اللہ تعالیٰ دی مدد نال پاکستان کوں کامیابی ملی، ملک بھر اچ معرکہ حق دے حوالے نال تقریباں تھیندیاں پیاں ہن۔ انہاں آکھیا جو بھارت چھوٹے اتے درمیانے سائز دے ڈرون ساݙے مختلف علاقیاں اچ بھیجے، بھارتی ڈرون تھوڑی تعداد اچ پاکستان پڄین، زیادہ تر ڈرونز کوں بارڈر تے ساݙے رینجرز تباہ کر ݙتے۔ بھارت دی کوشش ہئی جو سائبر حملے کرے پر سائبر حملیاں اچ بھارت ساݙے نیڑے وی نئیں آ سڳیا۔ انہاں آکھیا جو افواجِ پاکستان معرکہ حق اچ قوم دا سر اچا کیتے، اے ݙسݨ ضروری اے جو اساں معرکہ حق اچ کیا کیتے۔ پاکستان بھارت جنگ اچ ڈرونز دا استعمال ٻہوں تسلسل نال تھیا جیہڑا پہلے کݙاہیں نہ تھیا ہا۔ انہاں آکھیا جو نئی دہلی اچ بھارتی وزیراعظم دے گھر دے اتے ساݙے ڈرون گھمدے رہے جیندے نال بھارتی خوف زدہ تھی ڳئے ہن۔ ساݙا ٹارگٹ بھارتی سویلین شہری نا ہن ٻھل انہاں ساݙی سول آبادی کوں نشانہ ٻݨایا۔ ساݙی رینجرز بارڈر دے بالکل کٹھے موجود ہئی، بھارت کوں چٹے جھنڈے لہرانوݨے پئے ہن۔ محسن نقوی آکھیا جو بھارت نال جنگ اچ پاکستانی میڈیا دا کردار تعریف دے قابل ریہا، ساݙے میڈیا ہک سنیہا ݙے تے پوری قوم کوں کٹھا کیتا۔ معرکہ حق اچ پاکستانی میڈیا دے کردار دی وی کوئی مثال نئیں ملدی ڄݙاں جو بھارتی میڈیا مسلسل پریشان ہئی۔ انہاں آکھیا جو بھارت جنگ بندی توں پہلے ساݙی بیس تے حملہ کیتا ہا، اساں اوندے جواب اچ حملہ کیتا، انہاں دا سب توں وݙا آئل ڈپو تباہ تھیا۔ بھارت دے وݙے اہداف ساݙے نشانے تے ہن، انہاں دے جہاز اتے بحری تنصیبات ساݙے نشانے تے ہن، اوں ویلھے بھارت جنگ بندی کراوݨ پڄیا۔ سینیٹر محسن نقوی آکھیا جو ساݙے سکیورٹی اداریاں دا آپریشن بنیان مرصوص اچ مرکزی کردار ہئی۔ ساکوں بھارت توں ہر تفصیل ملدی پئی ہئی، ساݙی خفیہ ایجنسیاں بہترین کارکردگی ݙکھائی اے۔ وزیر داخلہ آکھیا جو پاک بھارت جنگ دے دوران امریکی صدر ٹرمپ بھارت کوں وݙے نقصان توں بچایا۔ معرکہ حق اچ بھارت کوں اتنا نقصان پچائے جو بھارت پاکستان دے خلاف ٻئی کوئی مہم جوئی کرݨ توں پہلے کئی واری سوچیسی۔ ہک سوال دے جواب اچ انہاں آکھیا جو امریکہ ایران جنگ بندی اچ فیلڈ مارشل عاصم منیر دی کوششاں تے بھروسہ رکھو۔