معرکہ حق: ڈی جی آئی ایس پی آر قوم دے غیر متزلزل عزم تے قومی موقف دی مؤثر ترجمانی کیتی

اسلام آباد۔7 مئی(اے پی پی) ڈی جی آئی ایس پی آر لیفٹیننٹ جنرل احمد شریف چوہدری معرکہ حق اچ قومی عزم دی بھرپور ترجمانی کریندے ہوئیں بھارتی بلا اشتعال جارحیت تے واضح اتے ݙوٹوک موقف اختیار کیتے، بھارتی بزدلانہ حملے توں ڳھن تے معرکہ حق دی کامیابی تئیں دنیا کوں قومی موقف توں ہر ویلھے باخبر رکھیا ڳے۔ معرکہ حق اچ پاکستان مؤثر سٹریٹجک کمیونیکیشن دے ذریعے واضح کیتا جو قومی عزم صرف دعویٰ کائنی کیوں جو پاکستان جو وی آکھیے او کر تے وی ݙکھائے۔ ڈی جی آئی ایس پی آر لیفٹیننٹ جنرل احمد شریف چوہدری 6 اتے 7 مئی 2025 دی وچلی رات بھارتی بلا اشتعال جارحیت تے واضح موقف اختیار کریندے ہوئیں آکھیا ہا جو بزدل دشمن بھارت اپݨی حدود توں پاکستان اچ شرمناک حملہ کیتے جیندا ویلھے سر، مؤثر اتے بھرپور جواب ݙتا ویسی۔ پاکستان اچ بزدلانہ حملے دا اتنا سخت جواب ݙتا ویسی جو بھارت دی عارضی خوشی ہمیشہ کیتے غم اچ بدل ویسی۔ بھارت بلا جواز اتے بلا اشتعال حملے نال پاکستان دی شہری آبادی کوں نشانہ ٻݨائے جیندا منہ توڑ جواب ݙتا ویسی۔ ڈی جی آئی ایس پی آر آکھیا جو پاکستان اپݨے ویلھے، ڄاہ اتے اپݨی مرضی دے مطابق بھارتی جارحیت دا فیصلہ کن جواب ݙیسی۔ دشمن توں معصوم شہریاں دے ناحق خون دے چھیکڑی پھینگ دا پورا حساب ڳھدا ویسی۔ جݙݨ پاکستان حملہ کریسی تاں بھارتی میڈیا کوں ݙسݨ دی وی لوڑھ نا پوسی، پوری دنیا ݙیکھسی جو پاکستان کیا کر ݙکھائے۔ اساں تہاݙی طاقت، جارحیت اتے مکاری توں ݙرݨ آلی قوم کائنی، ہݨ ساݙے بھرپور جواب دا انتظار کرو۔ بھارتی جارحیت دے خلاف پاک فوج دے ترجمان دے اے تاریخی الفاظ پاکستانی قوم دی جرات، یکجہتی اتے قومی عزم دی عکاسی کریندن۔