جو کرݨے کرو، اساں ہر طرح دی جنگ کیتے تیار ہیں، ڈی جی آئی ایس پی آر لیفٹیننٹ جنرل احمد شریف چوہدری دی پریس کانفرنس

راولپنڈی۔7 مئی(اے پی پی) پاک فوج دے شعبہ تعلقات عامہ (آئی ایس پی آر) دے ڈائریکٹر جنرل لیفٹیننٹ جنرل احمد شریف چوہدری بھارت کوں واضح اتے ݙو ٹوک سنیہا ݙتے جو جو کرݨے کرو، چاہے روایتی جنگ ہووے یا غیر روایتی، اساں پہلے وی تیار ہاسے اتے ہݨ وی تیار ہیں، اساں کھڑے ہیں اتے بھرپور طاقت نال جواب ݙیسوں، پاکستان دی سلامتی تے دفاع دا ہر قیمت تے تحفظ کیتا ویسی، کہیں دی مجال کائنی جو او فوج اتے عوام وچال آ سڳے، اساں آخری دہشت گرد دے خاتمے تئیں جنگ جاری رکھسوں۔ انہاں اے ڳالھ معرکہ حق دا ہک سال مکمل تھیوݨ تے ڈپٹی چیف آف ایئر سٹاف ائیر وائس مارشل طارق غازی اتے ڈپٹی چیف آف نیول سٹاف رئیر ایڈمرل شفاعت علی دے کٹھے پریس کانفرنس اچ آکھی۔ لیفٹیننٹ جنرل احمد شریف چوہدری آکھیا جو معرکہ حق اچ اللہ دے فضل نال مسلح افواج قوم دی امنگاں تے پوریاں اتریے ہیں، اساں اپݨے توں 5 گنا وݙے دشمن کوں ملٹی ڈومین وار اچ شکست ݙتی اے، اے ڳالھ پاکستانی ٻالاں دے نال نال ہندوستانی ٻال وی ڄاݨدن، اے ٻی ڳالھ جو ایکوں منیندے نئیں۔ انہاں آکھیا جو ہندوستان ٻہوں مکاری نال اے بیانیہ بݨایا جو پاکستان دہشت گردی اچ ملوث اے، پر اصلی حقیقت اے ہے جو بھارت آپ دہشت گردی اچ ملوث اے، بھارت اپݨے بیانیے کیتے “فالس فلیگ آپریشن” کیتے اتے پہلگام واقعے تے بغیر کہیں تحقیقات دے لمحیاں اچ پاکستان تے الزام لا ݙتا ٻھل دنیا بھارت دی من گھڑت ڳالھیں سݨݨ کیتے تیار کائنی۔ انہاں آکھیا جو پہلگام واقعے کوں ہک سال تھی ڳئے پر پاکستان جیہڑے سوال چاتے ہن او اڄ وی اوویں موجود ہن۔ بھارت ݙساوے جو کیہڑے دہشت گرد کیمپ کوں نشانہ ٻݨایا ڳئے؟ فائرنگ دے واقعے دے 15 منٹ دے اندرو ایف آئی آر تھی ڳئی جو دہشت گرد سرحد پار توں آئے ہن، پر بھارت دی انٹیلی جنس ایجنسیاں انہاں کوں روکݨ اچ ناکام کیوں رہین؟ ترجمان پاک فوج آکھیا جو کشمیر بھارت دا حصہ کائنی ٻھل اے ہک بین الاقوامی سطح تے منیا ہویا تنازعہ اے۔ بھارت اپݨے لوکاں تے خود دہشت گردی کرویندے اتے الزام ٻنھاں تے لا ݙیندے۔ انہاں آکھیا جو بھارت دے سیاستدان، سیاستدان گھٹ اتے جنگجو زیادہ لڳدن، بھارت دی پروفیشنل فوج کوں سیاست دی سول ٹنڳ ݙتا ڳئے۔ بھارتی سیاستدان “ہندوتوا” تے “اکھنڈ بھارت” دیاں ڳالھیں کریندے پئن، جیکر ایہا زبان ورتݨی اے تاں ول آؤ سامݨے، بھارت کیتے واضح سنیہا اے جو روایتی ہووے یا غیر روایتی، اساں کھڑے ہیں اتے جواب ݙیسوں، اے جنگ زمین، فضا، سمندر، سائبر اتے ذہناں دی جنگ اے، کہیں دے پیؤ دی وی مجال کائنی جو او پاکستان تے اکھ چاوے، جیکر کہیں کوں شک اے تاں اوکوں ہک قسط اساں ݙکھا چکے ہیں۔ انہاں آکھیا جو معرکہ حق اچ جیہڑا تساں ݙٹھے، او ساݙی مجموعی طاقت دا صرف 10 توں 15 فیصد اے، 14 اگست کوں ہک عظیم الشان پریڈ تھیسی، جتھاں اساں اپݨی قوت دی صلاحیت دی ہک چھوٹی جھئیں جھلک عوام کوں ݙکھیسوں، تاں جو بعد اچ کوئی اے نہ آکھے جو ݙسایا نا ہا۔ ڈی جی آئی ایس پی آر آکھیا جو پاک فوج دا سیاست نال کوئی تعلق کائنی، ڳالھ مہاڑ سیاسی جماعتاں دا حق اے، اساں تاں آہدے ہیں جو سیاستدان اپݨے معاملے ڳالھ مہاڑ نال آپ حل کرن۔ خطے دے امن دے حوالے نال انہاں آکھیا جو پاکستان ای امن کیتے سب توں زیادہ کوششاں کریندا پئے، ݙو ایٹمی طاقتاں وچال جنگ پاگل پن اے، پاکستان اتے سعودی عرب دے تعلقات ٻہوں تکڑے ہین اتے سعودی عرب کوں خطرہ ساݙے کیتے وی خطرہ اے۔ دہشت گرداں بارے انہاں آکھیا جو انہاں دا اسلام نال کوئی تعلق کائنی، اساں آخری دہشت گرد دے خاتمے تئیں لڑسوں۔ انہاں آکھیا جو پاکستان اچ دہشت گردی دے ہر واقعے دے پچھو بھارت اتے افغانستان ملوث ہین۔ ایں موقع تے پاک فضائیہ دے ایئر وائس مارشل طارق غازی ݙسایا جو اساں آپریشن بنیان مرصوص اچ بھارت دے 8 طیارے ݙھوائن، جیندے اچ 4 رافیل، ایس یو 30، مگ 29 اتے میراج 2000 شامل ہن۔ ایندے علاوہ ہک ٻہوں مہانگا خودکار ایئر سسٹم وی تباہ کیتا۔ رئیر ایڈمرل شفاعت علی آکھیا جو بھارت کوں اپݨی بحری طاقت تے ٻہوں ماݨ ہئی ٻھل او جارحیت دی ہمت نئیں کر سڳیا۔ ساݙیاں بندرگاہواں اتے تنصیبات محفوظ اتے فعال رہین، اساں امن چاہندے ہیں ٻھل ایکوں ساݙی کمزوری نہ سمجھیا ونڄے۔