پائیدار صحت دے نظام کیتے ہمدردی اتے خدمتِ خلق وی ضروری اے، صدرِ مملکت آصف علی زرداری

اسلام آباد۔ 8 مئی(اے پی پی) صدرِ مملکت آصف علی زرداری موسمیاتی تبدیلیاں توں پیدا تھیوݨ آلیاں آفات اتے صحت دے ہنگامی حالات پاروں حکومتی اداریاں اتے انسانی ہمدردی دی تنظیماں وچال تعاون کوں مضبوط ٻݨاوݨ تے زور ݙیندے آکھیے جو پائیدار صحت دے نظام کیتے صرف وسائل ہی نئیں، ہمدردی اتے خدمتِ خلق دی روح وی ضروری ہوندی اے، جیہڑی ریڈ کراس اتے ریڈ کریسنٹ تحریک دی بنیادی قدر اے۔ انہاں اے ڳالھ عالمی یومِ ریڈ کراس و ریڈ کریسنٹ دے موقع تے اپݨے سنیہے اچ آکھی۔ انہاں انسانی خدمت تے ریڈ کراس اتے ہلالِ احمر تحریک دے مخلص رضا کاراں کوں خراجِ تحسین پیش کیتے۔ انہاں آکھیا جو ریڈ کریسنٹ تحریک ملک اچ صحت دے مختلف اقدامات، قدرتی آفات توں نمٹݨ دی تیاری، اتے ما اتے ٻال دی صحت دیاں سہولتاں اچ ہک اہم شراکت دار رہی اے، حکومتِ انسانی ہمدردی دیاں تنظیماں نال شراکت داری کوں ودھ مؤثر بݨاوݨ کیتے پرعزم اے تاں جو ہر شہری تئیں طبی سہولتاں پڄ سقن۔ صدر سارے فریقاں توں اپیل کیتی جو او انسانیت اتے خدمت دے عزم دی تجدید کرن تاں جو اساں ہک صحت مند اتے محفوظ پاکستان تعمیر کر سڳوں۔