آپریشن بنیان مرصوص افواجِ پاکستان دی پیشہ ورانہ صلاحیت دا ثبوت اے، یوسف رضا گیلانی

اسلام آباد۔ 10 مئی(اے پی پی)چیئرمین سینیٹ سید یوسف رضا گیلانی آپریشن بنیان مرصوص دا ہک سال مکمل تھیوݨ تے “یومِ معرکہ حق” دے موقع تے آکھیے جو معرکہ حق دنیا تے واضح کر ݙتے جو پاکستان اپݨی خودمختاری تے سلامتی دے تحفظ سانگے ہر سطح تے پرعزم اے۔ چیئرمین سینیٹ سید یوسف رضا گیلانی آکھیے جو آپریشن بنیان مرصوص دشمن دی جارحیت دے خلاف افواجِ پاکستان دی پیشہ ورانہ صلاحیت تے بھرپور جواب دا عملی ثبوت اے۔ انہاں آکھیا جو معرکہ حق صرف عسکری کامیابی کائنی ٻھل پوری قوم دے اتحاد، ایمان اتے غیر متزلزل عزم دی علامت اے۔ چیئرمین سینیٹ آکھیا جو شہداء دی عظیم قربانیاں قوم سانگے باعثِ فخر ہن۔ انہاں آکھیا جو افواجِ پاکستان ہر محاذ تے جرات، مہارت اتے قربانی دی نویں مثال قائم کیتی اے۔ چیئرمین سینیٹ آکھیا جو نینگراں، میڈیا، سفارتی محاذ تے سرگرم افراد، سائنسداناں اتے انجینئرز قومی بیانیے کوں مضبوط بݨاوݨ اچ اہم کردار ادا کیتے، قومی یکجہتی ساݙی اصل طاقت اے، متحد قوم ہی ہر چیلنج دا مقابلہ کر سڳدی اے۔ انہاں آکھیا جو سیاسی اتے عسکری قیادت دی بصیرت تے عوام دے اعتماد پاکستان کوں ہر آزمائش اچ سرخرو کیتے۔ انہاں دا آکھݨ ہئی جو پاکستان امن کوں ترجیح ݙیندے پر اپݨی خودمختاری اتے علاقائی سالمیت تے کوئی سمجھوتہ نہ کریسی۔ سید یوسف رضا گیلانی آکھیا جو قوم اڄ ایں عزم دی تجدید کرے جو پاکستان کوں مضبوط، مستحکم اتے باوقار ریاست بݨاوݨ سانگے متحد راہسوں۔