وزیرِتوانائی دی بجلی دیاں تقسیم کار کمپنیاں کوں خراب کارکردگی دے حامل فیلڈ افسراں دے خلاف تادیبی کارروائی دی ہدایت

اسلام آباد۔ 3 جون (اے پی پی) وفاقی وزیرتوانائی سردار اویس احمد خان لغاری ملک دی ساری بجلی دی تقسیم کار کمپنیاں (ڈسکوز) کوں ہدایت کیتی اے جو او اپݨی حدود اچ خراب کارکردگی دا مظاہرہ کرݨ آلے سب ڈویژنل افسراں تے ایکسیئنز دے خلاف فوری تادیبی کارروائی دا آغاز کرن۔ ترجمان پاور ڈویژن موجب وفاقی وزیر دی ہدایت تے فوری عمل درآمد کریندے پشاور الیکٹرک سپلائی کمپنی (پیسکو) تے سکھر الیکٹرک پاور کمپنی (سیپکو) پہل کیتی اے۔ ݙوہیں کمپنیاں قومی ‘118 کال سینٹر سسٹم’ تے درج تھیوݨ آلی صارفین دی شکایتاں دے ازالے اچ ناکامی تے غفلت ورتݨ تے اپݨے خراب کارکردگی دے حامل افسراں کوں معطل کریندے انھاں دے خلاف محکمانہ کارروائی شروع کر ݙتی اے۔ ملک دی ٻئی ساری تقسیم کار کمپنیاں وی اپݨے اپݨے دائرہ اختیار اچ ایویں ہی نااہل افسراں دے خلاف تادیبی اقدامات دے عمل کوں حتمی شکل ݙیندیاں پئن۔وفاقی وزیر دے اے احکامات کسٹمر کمپلینٹ مینجمنٹ سسٹم یعنی پاکستان دے قومی 118 کال سینٹر توں حاصل کیتے ڳئے ڈیٹا دے جامع تے ذاتی جائزے دے بعد جاری کیتے ڳئے۔ اے ڈیٹا یکم اکتوبر 2025ء توں 31 مارچ 2026ء تئیں دی مدت تے محیط اے۔ لوڈ شیڈنگ، وولٹیج دے اتار چڑھاؤ، لائن فالٹس تے ٹرانسفارمر ٹرپنگ جیھاں شکایتاں دے ایں ریکارڈ توں افسراں دی مجرمانہ غفلت دا انتہائی تشویشناک رجحان سامݨے آیا۔ جائزے دے دوران اے پاتا ڳیا جو صارفین دی ہزاراں شکایتاں یا تاں مقررہ ویلھے دے بعد حل کیتیاں ڳیاں یا انھاں کوں بالکل ہی نظر انداز کر ݙتا ڳیا جیندے نتیجے اچ شہری تے دیہاتی علاقیں دے عوام کوں طویل عرصے تئیں بجلی دی بندش دا عذاب بھوڳݨا پیا ۔ پاور ڈویژن شکایتاں دے ازالے اچ ساریں توں ودھ تاخیر کرݨ آلے افسراں دی نشاندہی کرتے فہرستاں تیار کیتیاں تے فوری محکمانہ کارروائی کیتے انھاں کوں سارے ڈسکوز دے چیف ایگزیکٹوز کوں ارسال کرݙتا۔سردار اویس احمد خان لغاری صارفین دی شکایتاں دا وقتی ازالہ کرݨ جیھے بنیادی فرائض اچ ناکامی تے نامزد افسران دے رویے تے شدید مایوسی دا اظہار کیتا۔ انھاں واضح کیتا جو 118 کال سینٹر پلیٹ فارم دا قیام بالخصوص ایں سانڳے عمل اچ لاتا ڳیا ہئی تاں جو عوام تے بجلی ݙیوݨ آلے اداریں وچال فاصلیں کوں ختم کیتا ونڃ سڳے، جیڑھا وی افسر ایں نظام دے نال سرد مہری ورتیندا پئے او براہِ راست عوامی فلاح و بہبود دے حکومتی عزم کوں ضیان پڄیندا پئے۔ انھاں ہدایت کیتی جو انھاں سارے نشاندہی شدہ افسراں دے خلاف بلا تاخیر تادیبی کارروائی (بشمول معطلی) شروع کیتی ونڄے تے مروجہ سروس رولز دے تحت ایں کوں مقررہ ویلھے دے اندر منطقی انجام تئیں پڄایا ونڄے۔ایں سلسلے اچ پیسکو فرائض اچ غفلت تے طے شدہ اہداف حاصل نہ کرݨ تے 3 ایس ڈی اوز تے 1 ایکسیئن کوں وقتی معطل کر ݙتے۔ معطل تھیوݨ آلے ایس ڈی اوز پشاور سرکل دے تحت گلبرگ، شاہی باغ تے سیٹھی ٹاؤن/دلیزاک سب ڈویژنز اچ تعینات ہن جِنھاں کوں ہݨ روزانہ حاضری کیتے جنرل مینیجر (آپریشنز) پیسکو ہیڈ کوارٹرز دے نال منسلک کر ݙتا ڳئے۔ ایویں مردان-I ڈویژن دے معطل ایکسیئن کوں سپرنٹنڈنگ انجینئر (آپریشنز) مردان سرکل دے نال منسلک کیتا ڳئے۔ صوابی-I ڈویژن دے ایکسیئن (آپریشنز) کوں وی بدعنوانی تے ناقص کارکردگی تے معطل کرتے سپرنٹنڈنگ انجینئر (آپریشنز) پشاور سرکل دے ماتحت کر ݙتا ڳئے۔ اے احکامات مجاز اتھارٹی/سی ای او پیسکو دی منظوری نال جاری کیتے ڳئن۔سیپکو بھی 118 کال سینٹر تے شکایتاں دے ازالے اچ خراب کارکردگی ݙکھاوݨ تے 1 ایس ڈی او تے 1 (سابقہ) ایکسیئن کوں وقتی طور تے معطل کر ݙتے۔ معطل تھیوݨ آلیں اچ روہڑی سب ڈویژن دے ایس ڈی او آپریشن سجاد علی میمن تے سکھر ڈویژن دے ایں ویلھے دے ایکسیئن (آپریشنز) معراج الدین شیخ شامل ہن جیڑھے اڄ کل ایکسیئن کنسٹرکشن ڈویژن سکھر دے طور تے کام کریندے پئن۔ انھاں ݙوہیں کوں حاضری کیتے سیپکو ہیڈ کوارٹرز رپورٹ کرݨ دی ہدایت کیتی ڳئی اے۔ اے احکامات سی ای او سیپکو دی منظوری نال جاری تھئن۔احتساب دا اے عمل صرف پیسکو تے سیپکو تئیں محدود نہ رہسی، ٻئے سارے ڈسکوز بشمول لیسکو، گیپکو، فیسکو، آئیسکو، میپکو، ہیزیکو، ہیسکو، کیسکو تے ٹیسکو وی سی سی ایم ایس پلس دے ڈیٹا دی روشنی اچ اپݨے خراب کارکردگی آلے افسراں دے خلاف کارروائی دا آغاز کریندیاں پئن۔ انھاں ساریاں کمپنیاں اچ مجموعی طور تے 100 توں ودھ ایس ڈی اوز تے ایکسیئنز دی نشاندہی کیتی ڳئی اے جِنھاں کوں وقتی ہی شوکاز نوٹسز، معطلی تے غیر آپریشنل عہدیں تے تبادلے جیھاں محکمانہ کارروائیاں دا سامݨا کرݨا پوسی۔ وفاقی وزیر سارے ڈسکوز کوں ہدایت کیتی جو او سب ڈویژن تے ڈویژن دی سطح تے شکایتاں دے حل دی شرح تے نظر رکھݨ کیتے ہفتہ وار نگرانی دا ہک فعال نظام وضع کرن، جیڑھے افسر شکایتاں دے انتظام اچ مسلسل ناکام ثابت تھیسن انھاں دے خلاف سخت اقدامات کیتے ویسن جِنھاں اچ معطلی، نان آپریشنل سیٹاں تے تبادلہ تے جبری ریٹائرمنٹ شامل اے۔پاور ڈویژن اے اعلان وی کیتے جو سارے ایس ڈی اوز تے ایکسیئنز دی کارکردگی دی رینکنگ ہر سہ ماہی دی بنیاد تے پبلک کیتی ویسے تاںجو پاور سیکٹر اچ شفافیت تے جوابدہی دے حکومتی عزم کوں تقویت ملے۔ سردار اویس احمد خان لغاری ایں عزم دا اعادہ کیتا جو موجودہ حکومت پاکستان دے ہر بجلی صارف کوں وقتی ، قابلِ اعتماد تے باعزت خدمات ݙیوݨ کیتے پوری طرح کاربند اے جیڑھا جو انھاں دا حق اے۔ انھاں زور ݙتا جو فیلڈ افسران دی ناقص کارکردگی محض ہک انتظامی کوتاہی کائںی بلکہ پاکستان دے شہریاں دے نال ناانصافی اے جیں کوں حکومت کہیں صورت برداشت نہ کریسی۔ انھاں ݙوٹوک الفاظ اچ آکھیا جو مسلسل غفلت دے مرتکب افسراں کوں سخت تادیبی سزاواں دا سامݨا کرنا پوسی بشمول معطلی، غیر حساس عہدیں تے منتقلی تے لوڑھ پووݨ تے جبری ریٹائرمنٹ۔ پاور ڈویژن پاکستان دے بجلی دی تقسیم دے نظام کوں ہک ایجھےکارکردگی تے صارف دوست نظام اچ تبدیل کرݨ کیتے پرعزم اے جتھاں ہر شکایت کوں ترجیح ݙتی ونڄے تے صارف دے وقتی سروس دے حق دا ہر قیمت تے تحفظ کیتا ونڄے۔ حکومت پاور سیکٹر اچ ڈیجیٹلائزیشن تے گورننس اصلاحات دے ذریعے تمام ڈسکوز دی آپریشنل کارکردگی دی کڑی نگرانی کریندی پئی اے۔ 118 کسٹمر کمپلینٹ مینجمنٹ سسٹم دی نویں سروں بحالی تے ایں کوں مضبوط بݨاوݨ دے تحت ہݨ صارفین دی شکایتاں دا ہک جامع ڈیجیٹل ڈیٹا بیس برقرار رکھیا ویندا پئے جیندے نال شکایتاں دی نوعیت، انھاں دے حل دی مدت تے سروس دے معیار دی حقیقی وقت اچ جانچ ممکن تھی ڳئی اے، اے نظام خرابیاں دی تفصیلات، انھاں دے حل دے دورانیے تے سب ڈویژن و ڈویژن دی سطح تے شکایتاں نال نبٹݨ اچ ورتی ونڄݨ آلی کہیں وی قسم دی کوتاہی دا تفصیلی ریکارڈ رکھیندے۔ ایں اصلاحاتی اقدام فیلڈ فارمیشنز دی کارکردگی دا غیر جانبدارانہ جائزہ گھنݨ تے ڈسکوز اچ تعینات افرادی قوت دی استعداد کار کوں پرکھݨ دی حکومتی صلاحیت اچ نمایاں ودھارا کیتے۔