وفاقی وزیر اویس لغاری سارے ڈسکوز کوں کنزیومر پرسیپشن سروے دے طریقہ کار، معیارات تے شیڈول کوں حتمی شکل ݙے تے سروے وقتی شروع کرݨ دے احکامات جاری

اسلام آباد۔ 17 ستمبر (اے پی پی) وفاقی وزیرِ توانائی سردار اویس احمد خان لغاری سارے ڈسکوز کوں کنزیومر پرسیپشن سروے دے طریقہ کار، معیارات تے شیڈول کوں حتمی شکل ݙے تے سروے وقتی طور تے شروع کرݨ دے احکامات جاری کیتن۔ ترجمان پاور ڈویژن موجب وفاقی وزیر پاور ڈویژن دی زیرِ صدارت اجلاس اچ انہاں ہدایت کیتی جو سروے دے معیارات نیپرا دے مقرر کیتے ڳئے پیرامیٹرز موجب ہووݨے چاہیدن تاں جو صارفین دی صلاح کوں حقیقی معنیں اچ اہمیت ݙتی ونڄ سڳے۔ ایں توں ڈسکوز دی کارکردگی تے خدمات تے صارفین دے اطمینان دا تعین ہوسی تے سروے دے نتیجے مستقبل دی پالیسی سازی اچ معاون ثابت تھیسن۔ وفاقی وزیر احکامات ݙتے جو متعلقہ فریقین سروے دی منظوری وقتی مکمل کرن تاں جو عمل بلا تاخیر شروع تھی سڳے، سروے ہر چھی مہینے بعد لازمی طور تے مکمل کیتا ونڄے جݙاں جو سالانہ شیڈول اچ گھٹو گھٹ ھک سروے موسمِ انہالے اچ شامل ہووے۔ وفاقی وزیر آکھیا جو اے سروے محض انتظامی کارروائی کائںی بلکہ صارفین دی فلاح تے خدمت دے عزم دا عملی مظہر اے ڄیندا مقصد عوام کوں ݙتی ڳئی خدمات اچ بہتری گھن آوݨا اے۔ اویس لغاری صارفین توں اپیل کیتی جو سروے دے دوران اپݨی دیانتدارانہ تے بلا جھجک سلاح ݙیون کیوں جو انہاں دی سچی صلاح ہی ادارے دی کارکردگی اچ بہتری دی بنیاد بݨسی تے حکومت و متعلقہ اداریں کوں زیادہ باخبر، شفاف تے دانشمندانہ فیصلے کرݨ دے قابل بݨیسی جیندے نال بجلی دے شعبے اچ صارفین دے اعتماد تے اطمینان اچ ودھارا تھیسی۔