عالمی بینک دا پاکستان نال تعاون لائقِ ستائش، افرادی قوت کوں جدید تقاضیں موجب تیار کرݨ ضروری اے، وزیرِ خزانہ

اسلام آباد۔ 3 جون (اے پی پی) وفاقی وزیر خزانہ و محصولات محمد اورنگزیب عالمی بینک گروپ دی طرفوں پاکستان دے نال پراݨے تے پائیدار تعاون دی تعریف کریندے آکھیے جو پاکستان دی افرادی قوت کوں تکھے بدلتی عالمی معیشت دے تقاضیں موجب تیار کرݨا ضروری اے، انھاں انسانی سرمائے دے اشاریں کوں بہتر بݨاوݨ، افرادی قوت دی شرکت کوں تکڑا کرݨ تے بدلدی لیبر مارکیٹ دی لوڑھ موجب نینگراں کوں ہنر تے مہارتاں ݙیوݨ دی لوڑھ تے زور ݙتا۔ انھاں اے ڳالھ اتھاں عالمی بینک گروپ دے وفد نال ملاقات اچ آکھی جیں دی قیادت انسانی ترقی (صحت، تعلیم تے سماجی تحفظ) دی نائب صدر ممتا مرتھی کریندیاں پئیاں ہن۔ عالمی بینک دی پاکستان اچ کنٹری ڈائریکٹر بولورما آمگابازر، انسانی ترقی دی علاقائی ڈائریکٹر کیکو اینوئی، ہیلتھ پریکٹس مینیجر شین ورکی تے آئی ایف سی دے ڈائریکٹر سائمن اینڈریو وی وفد اچ شامل ہن۔وزیرِ خزانہ وفد دا خیرمقدم کریندے عالمی بینک گروپ دی طرفوں پاکستان دے نال مسلسل شراکت داری دی تعریف کیتی ملک دی ترقیاتی تے اصلاحات دے ترجیحات اچ گروپ دے تعاون دا اعتراف کیتا۔ انھاں آکھیا جو پاکستان معاشی استحکام دی بحالی دے حوالے نال اہم پیشرفت کیتی اے تے حکومت دی توجہ ہݨ صحت، تعلیم، مہارتاں دی ترقی تے سماجی تحفظ اچ ہدف تے مبنی سرمایہ کاری دے ذریعے سماجی تے انسانی ترقی دے نتیجے بہتر بݨاوݨ تے مرکوز اے۔ انھاں پاکستان کیتے ورلڈ بینک دے طویل المدتی کنٹری پارٹنرشپ فریم ورک دے تحت قابلِ پیمائش نتائج تے مؤثر عمل درآمد تے مضبوط توجہ برقرار رکھݨ دی اہمیت تے زور ݙتا۔ وزیرِ خزانہ آکھیا جو پاکستان دی وݙی تے نوجوان آبادی ہک اہم موقع تے اہم پالیسی ترجیح اے، لوڑھ ایں ڳالھ دی اے جو انسانی سرمائے دے اشاریں کوں بہتر بݨایا ونڄے، افرادی قوت دی شرکت کوں مضبوط کیتا ونڄے، تے نوجواناں کوں بدلدی لیبر مارکیٹ دی لوڑھ موجب مہارتاں ݙتیاں ونڄن۔ وزیرِ خزانہ آکھیا جو پائیدار معاشی ترقی تے مسابقتی صلاحیت کیتے لوکاں تے مسلسل سرمایہ کاری دے نال نال پیداواری صلاحیت، خدمات ݙیوݨ تے روزگار دے موقع بہتر بݨاوݨ کیتے اصلاحات وی ناگزیر ہن۔ملاقات اچ پاکستان دا انسانی ترقی دا ایجنڈا سرفہرست رہیا جیندے اچ زچہ و بچہ دی صحت، غذائیت، حفاظتی ٹیکہ جات، ابتدائی بچپن دی نشوونما، تعلیمی نتائج تے آبادی متعلق چیلنجز شامل ہن۔ ممتا مرتھی زور ݙتا جو طویل المدتی ترقیاتی نتائج دا انحصار انسانی سرمائے دے کلیدی اشاریں اچ مسلسل بہتری بالخصوص ٻالاں دی غذائیت، نشوونما اچ رکاوٹ و کمی، بنیادی تعلیم دے معیار تے معیاری صحت و تعلیم دی خدمات تئیں رسائی دے حوالے نال ہوسی۔ انھاں آکھیا جو عالمی بینک دی شمولیت دا مقصد قابلِ پیمائش نتیجے دے حصول تے خدمات ݙیوݨ دے نظام کوں مضبوط بݨاوݨ اے تاںجو ملک اچ مؤثر انداز اچ ماواں تے ٻالاں تئیں ضروری مداخلتاں پڄ سڳن۔ اجلاس اچ بنیادی صحت دے نظام کوں مزید مضبوط بݨاوݨ تے ماواں تے ٻالاں کیتے ضروری خدمات تئیں رسائی ودھاوݨ دے امکانات تے وی غور کیتا ڳیا۔ شرکاء صحت، تعلیم تے افرادی قوت دی ترقی اچ مصنوعی ذہانت تے ڈیجیٹل ٹیکنالوجیز دے ودھدے کردار تے ڳالھ کیتی ۔ وزیرِ خزانہ ایں ڳالھ تے زور ݙتا جو پاکستان دی افرادی قوت کوں تکھے نال بدلدی عالمی معیشت دے تقاضیں موجب تیار کرݨا ضروری اے۔عالمی بینک دے وفد ٹیکنالوجی تے مبنی خدمات ݙیوݨ، صحت دی مالی معاونت تے نجی شعبے دی شمولیت نال متعلق بین الاقوامی تجربیں دا ݙسایا ۔ ڳالھ دا ہک اہم حصہ مہارتاں دی ترقی، افرادی قوت دی تیاری تے روزگار دے موقع پیدا کرݨ تے مرکوز رہیا۔ وزیرِ خزانہ ابھردی معاشی ضرورتاں کوں پورا کرݨ تے زیادہ قدر آلے روزگار دے موقع تئیں رسائی کیتے پاکستان دی افرادی قوت دی مہارتاں اچ ودھارا تے ازسرِ نو مہارت سازی دی اہمیت تے زور ݙتا۔ انھاں آکھیا جو بالخصوص نوجواناں دی ملازمت دے قابل صلاحیتاں اچ ودھارا حکومت دے وسیع تر معاشی تبدیلی دے ایجنڈے دا مرکزی جزو رہسی۔ عالمی بینک دے وفد افرادی قوت دی ترقی، تکنیکی و پیشہ وارانہ تربیت، تے روزگار تے مبنی مہارتی پروگراماں متعلق بین الاقوامی تجربیں دا تبادلہ کیتا۔ ایں ڳالھ تے زور ݙتا ڳیا جو صنعتاں دے نال مضبوط رابطے، تربیتی اقدامات اچ نجی شعبے دی زیادہ شمولیت تے نتیجے تے مبنی طریقہ کار ضروری ہن تاں جو مہارتاں دی ترقی دے پروگرام حقیقی لیبر مارکیٹ دی طلب تے روزگار دے موقع موجب ہم آہنگ تھی سڳن۔اجلاس اچ حکومت، عالمی بینک گروپ تے نجی شعبے وچال پاکستان دے انسانی سرمائے دے اہداف دے حصول کیتے وسیع تر تعاون دے امکانات دا وی جائزہ ڳھدا ڳیا۔ ایں ضمن اچ ممتا مرتھی پاکستان کوں اڄوکے سال دے چھیکڑ اچ جاپان اچ منعقد تھیوݨ آلے یونیورسل ہیلتھ کوریج متعلق عالمی فورم اچ شرکت دی دعوت وی ݙتی۔ انھاں ݙسایا جو اے فورم حکومتِ جاپان دے تعاون نال منعقد تھیوݨ آلا ہک مشترکہ اقدام اے جیں کوں ورلڈ بینک گروپ تے عالمی ادارہ صحت سانجھے طور تے سہولت ݙیندے پئن تاں جو یونیورسل ہیلتھ کوریج دے حصول دے پاسے پیشرفت کوں ودھارا ݙتا ونڃ سڳے۔ وزیرِ خزانہ عالمی بینک گروپ دی مسلسل شمولیت دی تعریف کیتی تے انسانی سرمائے کوں مضبوط بݨاوݨ، سماجی نتیجے بہتر کرݨ، روزگار دے موقع اچ ودھارا کرݨ تے جامع و پائیدار معاشی ترقی دی حمایت کرݨ آلی اصلاحات کیتے حکومت دے عزم دا اعادہ کیتا۔ فریقین صحت، تعلیم، سماجی تحفظ، افرادی قوت دی ترقی تے ٹیکنالوجی تے مبنی خدمات ݙیوݨ دے شعبیں اچ پاکستان دی ترجیحات کوں اڳوں ودھاوݨ کیتے سانجھا تعاون جاری رکھݨ دے عزم دا وی اعادہ کیتا۔